Foto: shtrafy.kz
Jambyl oblysynyń Qordai aýdanynda shetel azamattaryn jalǵan mekenjailarǵa tirkeý faktileri anyqtaldy. Bul týraly oblystyq prokýratýra habarlady.
Tekserý barysynda Qalǵuty aýylyndaǵy mekenjailardyń birine Ózbekstannyń 12 azamaty tirkelgeni belgili boldy. Alaida olar is júzinde Almaty qalasynda turyp, sol jerde jumys istegen.
Osyǵan uqsas zań buzýshylyq Sortóbe aýylynda da tirkelgen. Onda Qyrǵyz Respýblikasynyń 9 azamaty jalǵan tirkeýge qoiylyp, naqtysynda basqa óńirlerde turǵany anyqtalǵan.
Bas prokýratýranyń málimetinshe, mundai zańsyz shemalar kóshi-qon esebin burmalap qana qoimai, qoǵamdyq qaýipsizdikke qaýip tóndirip, ózge quqyq buzýshylyqtardy jasyrý úshin de paidalanylýy múmkin.
Prokýrorlyq qadaǵalaý aktileri negizinde jalǵan tirkeýlerdiń kúshi joiylyp, kináli tulǵalar jaýapqa tartyldy.
Sonymen qatar prokýratýra úilestirýimen sheteldik jumys kúshin zańsyz paidalanǵandarǵa qatysty qylmystyq jaýapkershilik tájiribesi engizilgen.
Máselen, shetel azamattaryn zańsyz jumysqa tartqany úshin buǵan deiin eki ret ákimshilik jaýapkershilikke tartylǵan dámhana iesi 2025 jyldyń jeltoqsany men 2026 jyldyń qańtarynda qaitadan zań buzǵan. Ol ruqsat qujattaryn rásimdemei, shetel azamattaryn jumysqa qabyldaǵan.
Atalǵan derek boiynsha Qylmystyq kodekstiń 395-baby negizinde sotqa deiingi tergeý júrgizilip, is sotqa joldanǵan. Sot úkimimen kináli tulǵaǵa 50 AEK kóleminde aiyppul salyndy.
