Jańatasta kóp qabatty úidegi órtten bes bala qaza tapty, dep habarlaidy "Ult aqparat" ákimdikke silteme jasap.
Jambyl oblysy Sarysý aýdany Jańatas qalasyndaǵy 2 yqshamaýdandaǵy 5 qabatty turǵyn úidiń 3-shi qabatynda órt bolyp, 16 sharshy metr aýmaqty sharpydy (kiimder men jihaz otqa orandy).
Páter ishinde ata-ananyń qaraýynsyz kámelet jasyna tolmaǵan 2015, 2016, 2017, 2019 jáne 2020 jyldary týǵan bes bala qalyp qoiǵan.
Aldyn ala málimetter boiynsha, úidiń otaǵasy jumysta bolǵan, al anasy dúkenge shyǵyp ketken. Órt saldarynan kámelet jasyna tolmaǵan balalar tútinge ýlanyp, jedel túrde aýrýhanaǵa jetkizildi. Alaida araǵa biraz ýaqyt salyp, kóz jumǵan.
Oqys oqiǵanyń sebebin anyqtaý úshin Jambyl oblysy ákiminiń tapsyrmasymen arnaiy komissiia quryldy. Oblys ákiminiń orynbasary Ulan Jazylbektiń tóraǵalyǵymen komissiia oqiǵa ornyna attandy. Komissiia quramyna prokýratýra, politsiia departamenti, tótenshe jaǵdailar jónindegi departament pen basqa da múddeli memlekettik organdardyń ókilderi engen.
Jergilikti atqarýshy organdar tarapynan qara jamylǵan otbasyǵa jan-jaqty kómek kórsetiledi. Psiholog mamandar jumyldyrylyp, jerleý sharalaryn uiymdastyrýǵa járdem berilmek.
Jańatasqa Jambyl oblystyq TJD basshysy men jedel top, jyljymaly órt-tehnikalyq zerthana, órt sóndirý qyzmeti men apattyq-qutqarý qyzmetiniń psihologtary shyqty.
Budan bólek, Jańatas qalasyna oblys prokýrory Nurǵalym Ábdirov pen Politsiia departamentiniń basshysy Janat Súleimenov attandy.
Oqys oqiǵa ornynda órt sóndirý qyzmetiniń 6 qyzmetkeri 1 dana tehnika jumys atqardy. Órt tolyǵymen aýyzdyqtaldy.
Órtengen zattardaǵy gazdardyń tolyq janbaýynan ýly gaz túzilip, ýlaný jaǵdailaryna ákep soǵady.
