Ishki ister ministri Erlan Turǵymbaev pen Aqparat jáne qoǵamdyq damý ministri Dáýren Abaev Jambyl oblysy Qordai aýdanyndaǵy janjalǵa qatysty OKQ-da baspasóz máslihatyn ótkizip jatyr, dep habarlaidy "Ult aqparat".
«7 aqpanda saǵat 19.00-de Jambyl oblysynyń Politsiia departamentiniń kezekshi bólimine Qordai aýdany Masanchi aýylynda 70-ten astam adam tóbelesip jatyr degen habarlama kelip tústi. Zańsyz áreketterdi toqtatý úshin oqiǵa ornyna dereý politsiia qyzmetkerleri jiberildi. Sol jerde bolǵan adamdar tóbelesti videoǵa túsirip, áleýmettik jeli arqyly taratqan. Osynyń saldarynan basqa aýyldardan kelgen 300-den astam azamat tóbeleske qosylyp ketken. Eki jaq bir-birine tas laqtyryp, taiaqpen uryp, qarý qoldandy. 8 adam kóz jumdy. 40-tan astam adam jaraqat aldy», - dedi Ishki ister ministri OKQ-da ótken baspasóz máslihatynda.
Ministrdiń aitýynsha, jaǵdaidy turaqtandyrý úshin oqiǵa ornyna ishki ister organdarynyń qosymsha kúshteri jiberildi.
«Sonymen qatar, Ishki ister ministriniń orynbasary men Bas prokýrordyń orynbasary sol jerge bardy. Jedel tergeý toby qurylyp, adam ólimi, buzaqylyq faktileri boiynsha birneshe qylmystyq is qozǵaldy. Qazirgi kúni jaǵdai turaqty», - dedi Erlan Turǵymbaev.
Buǵan deiin Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles bolǵanyn habarlaǵan bolatynbyz.
Politsiia "Adam óltirý" jáne "Tártipsizdik uiymdastyrý" baby boiynsha qylmystyq ister qozǵady.
Kóp ýaqyt ótpei Prezident Qasym-Jomart Toqaev osy oqiǵaǵa qatysty pikir bildirdi.
«Jambyl oblysy Qordai aýdanynda buzaqylyq sipattaǵy jappai tóbeles boldy. Ony arandatýshylar óz paidasyna qoldanbaq bolǵan. Politsiia jaǵdaidy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady», dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqiǵaǵa bailanysty málimdeme jasady.
