Foto:stan.kz
Tótenshe jaǵdailar departamenti mamandarynyń aitýynsha, nóser jaýyn jaýatyn bolsa, Shý, Talas, Asa ózenderiniń sý deńgeii kóterilip, mańaidaǵy eldi mekenderdi sý basyp qalýy múmkin. Bul týraly Stan.kz aqparat agenttigi 24.kz-ke silteme jasap habarlaidy.
Teris-Ashybulaq sý qoimasynyń ruqsat etilgen kólemi 158,5 million tekshe metr sýdy quraidy. Qazir ol 97% toly. Sý qoimadan asyp ketpes úshin Asa ózenine quiylady. Ádette aǵyzylatyn sý sekýndyna 15 tekshe metrden aspasa, qazir ony 40-qa deiin arttyrǵan.
Bul jaǵdai Jambyl oblysyndaǵy sý qoimasynyń mańynda ornalasqan úi ielerin alańdatty. Olar 7 jyl buryn Asa ózeniniń arnasynan asqan sý aýlalardy basyp ketkenin aitady.
Aýyl turǵyndary Asa ózeniniń tasýy qaitalanady dep qaýiptenedi.
"Jyldan jylǵa aýylǵa sý jaqyndap keledi, sý basady dep qorqamyz. Bul jerde ózenniń tasýyna jol bermeý úshin jaǵalaýlardy nyǵaitý qajet. Qazir jańbyr jaýyp, sý deńgeii kóterilýi múmkin. Tótenshe jaǵdailar departamentiniń mamandary Asa ózeninen eldi mekenderdi sý basý qaýpin joqqa shyǵarmaidy. Bul qatty jańbyrdyń saldarynan bolýy múmkin",-deidi Báiterek aýylynyń turǵyny Qurmanbek Esimbekov.
Óńirde aýa raiyna bailanysty eskertý jariialandy.
"Sinoptikter jaýyn-shashyn normadan joǵary bolady degen boljam jasady. Ondai jaǵdaida Teris-Ashybulaq sý qoimasynan budan da joǵary tekshe santimetr sý shyǵýy múmkin. Sol arqyly Jambyl oblysyndaǵy 4 eldi mekendi sý basý qaýpi tónip tur. Oblysymyzda ornalasqan gidrotehnikalyq qurylystardyń toltyrylýyna kúndelikti monitoring júrgizilip otyr", - dedi tótenshe jaǵdailar departamenti basshysynyń mindetin atqarýshy Darhan Japarov.
Oblystyń barlyq gidrotehnikalyq qurylystarynyń jalpy tolymdylyǵy 87% quraidy. Jambyl aýdanynyń qaýipti ýchaskelerin jumys toby zerttedi. Sarapshylar jergilikti atqarýshy organdarǵa jaǵalaýdy nyǵaitýdy usyndy. Sonymen qatar, Shý, Talas ózenderindegi sý deńgeiiniń joǵarylaýyna bailanysty olardyń janynda ornalasqan 42 eldi mekendi sý basý qaýpi joǵary. Óńirdegi sý qoimalarynyń jai-kúii mamandardyń erekshe baqylaýyna alyndy.
