Jambyl oblysynda 119 myń turǵynǵa kommýnaldyq ótemaqy berý kózdelýde. Bul týraly oblys ákiminiń orynbasary Erjan Jylqybaev málim etti, dep habarlaidy "Ult aqparat".
«Búgingi tańda halyq úshin mańyzdy aqparattyń biri - Tótenshe jaǵdai kezeńinde kommýnaldyq qyzmetterdi jetkizýshilerdiń shyǵyndaryn óteý jaiynda. Tutynýshylardyń abonenttik esep shotyna ai saiyn (2 aiǵa) tikelei 15 myń teńge aýdarylyp, kommýnaldyq qyzmet aqysy óteledi. Jalpy oblys boiynsha osy baǵytta 119 myń turǵyndy qamtýdy josparlap otyrmyz. Bul boiynsha CALL ortalyq quryldy», - deidi oblys ákiminiń orynbasary.
Onyń aitýynsha, kommýnaldyq qyzmetterdi óteý 7 sanattaǵy azamattarǵa berilmek. Olar: 1, 2, 3 toptaǵy múgedekter, múgedek bala tárbieleýshi otbasylar, kópbalaly otbasylar, UOS múgedekteri men qatysýshylary jáne olarǵa teńestirilgen azamattar, memlekettik nemese qoǵamdyq mindetterin, áskeri qyzmetin oryndaý kezinde, adamdy qutqarý kezinde, quqyq tártibin qorǵaý kezinde qaza tapqan adamdardyń otbasy, eń tómen jáne az zeinetaqy alatyn zeinetkerler, ataýly áleýmettik kómek alatyn azamattar, onyń ishinde jalǵyzbasty zeinetkerler.
Sondai-aq, budan ózge, oblystyq Nur Otan partiiasy filialymen birlese, «BizBirgemiz» qory qarajatynan Taraz qalasy boiynsha halyqtyń áleýmettik osal toptaryna kómek berý júrgizildi.
«Azamattar tizimi 7 sanat boiynsha jasaqtalyp, búgingi kúnge 16 768 azamattyń esep shotyna 50 myń teńgeden aýdaryldy. Barlyǵy 838 mln teńge kómek jasaldy. Sonymen qatar, Nur Otan partiiasynyń aimaqtaǵy belsendi músheleri, jeke kásipkerlerdiń kómegimen 80 mln teńge kóleminde qarjy jinalyp, 3 myń otbasy alǵashqy kezektegi qajettiliktegi azyq-túlik sebetimen qamtylǵan», - deidi E.Jylqybaev.
