Jambyl oblysy Jańatas qalasynda "Qazgidromet" mamandary ábden tozyǵy jetken ǵimaratty panalap otyr. Al onyń syrtyndaǵy taqtaishada áli kúnge deiin "Qorshaǵan Ortaný Qorǵaý Ministrligi" degen jazý tur, - dep habarlaidy Massaget.kz portaly "Astana" telearnasyna silteme jasap.
Telearna málimetinshe, áleýmettik jelide qyzý talqylanyp jatqan videoǵa qatysty "Qazgidromet" respýblikalyq memlekettik kásipornynyń baspasóz hatshysy Alina Ismaǵulova jaýap berdi. Onyń aitýynsha, ǵimarat jóndeýge kelmeidi. Byltyr apatty dep tanylǵan. Al, mańdaishany aýystyrý stantsiia kóshirilgen kezde retteledi eken.
"Komissiialyq tekserý nátijeleri boiynsha 2022 jyly aqpanda ony jańa orynǵa aýystyrý týraly sheshim qabyldandy, sebebi qazirgi ornalasqan jeri basqarý qujattarynyń talaptaryna sáikes kelmeidi jáne ǵimaratqa jóndeý júrgizý múmkin emes. Jańa blok-modýl kóshirý úshin daiyn, ornalasý ornyn rastaý kútip otyrmyz", - deidi "Qazgidromet" RMK baspasóz hatshysy Alina Ismaǵulova.
Qazgidromet mamandarynyń aitýynsha, jergilikti bilik meteorologiialyq stantsiianyń qyzmettik keńsesi úshin jer telimin áne beremiz, mine beremiz dep sozyp kele jatqan kórinedi. Al Jańatas qalasynyń ákimi mundai problema joǵyn, jer berilgenin aitady.
"Biyl Jańatas qalasy aýmaǵynda ornalasqan "Qazgidromet" mekemesiniń atynan jer bólip berý týraly ótinish túsken. Bul ótinishke sáikes qala aýmaǵynan "Qazgidromet" mekemesine tórt jer usynyldy. Sol mekemeniń tańdaǵan jeri qazirgi tańda berildi", - deidi Jańatas qalasynyń ákimi Dúisenáli Borsyqov.
