Foto: filarmoniianyń baspasóz qyzmeti
Jambyl atyndaǵy Qazaq Memlekettik akademiialyq filarmoniia solisteriniń 90-shy mereitoilyq maýsymy ashyldy.
Filarmoniianyń úlken zalynda ótken aitýly sharada óner ujymynyń jetekshi solisteri óner kórsetip, tyńdarmanǵa umytylmas mýzykalyq áser syilady. Arnaiy baǵdarlamada kópshilik nazaryna virtýozdy mýzykanttardyń oryndaýyndaǵy álemdik klassika men dástúrli mýzykanyń jaýharlary usynyldy.
Óz tyńdarmandaryn janrlyq alýandyǵymen tańdai qaqtyrǵan kontsertte ujymda kóp jyldan beri tabandy eńbek etip kele jaqan Gúljan Ózenbaeva, Aida Aiýpova, Gúlnara Qurambaeva, Ermek Qurmanaev syndy Qazaqstannyń eńbek sińirgen qairatkerleri, mádeniet qairatkeri Erjan Álimbetov, Ádil Nesipbaev, Maqpal Qazybekqyzy, Musa Kerimbaev syndy mádeniet salasynyń úzdikteri óner kórsetti. Ulttyq jáne álemdik klassikanyń úilesimimen erekshelengen keshte qazaqtyń halyq áni «Aqbaqai», Úkili Ybyraidyń «Gákkýinen» bastap áigili Bahtyń organǵa arnalǵan «Tokkata jáne fýga re minor» syndy týyndylary oryndaldy.
Aita ketý kerek, tarih tolqynynda talai mádeni oqiǵalarǵa kýá bolǵan filarmoniia úshin dástúrli óner men otandyq kompozitorlardyń eńbekterin keńinen nasihattaý – basty qaǵida sanalady. Bul rette ujym toqsan jyl boiy osy baǵyttan taimai, óner biigin baǵyndyryp keledi. Filarmoniia solisteriniń búgingi maýsymashar kontserti osy úrdiske aiqyn dálel boldy.
