Osy jyldyń 2 aiynda ministrlikter 55 mlrd teńge biýdjet qarajatyn igermedi. Bul týraly búgin Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Memlekettik biýdjettiń shyǵystary - 96,9, respýblikalyq biýdjettiń shyǵystary – 97,7, jergilikti biýdjetterdiń shyǵystary 96 paiyzǵa atqaryldy. Respýblikalyq biýdjet boiynsha somasy 2 trln 683 mlrd teńgege shyǵystar júrgizildi. Atqarylmaý 64 mlrd teńgeni qurady, onyń ishinde 9 mlrd teńge - únemdeý. Igerilmegeni - 55 mlrd teńge», - dedi ministr.
Onyń dereginshe, igerilmeýdiń neǵurlym iri somalary Bilim jáne ǵylym, Densaýlyq saqtaý, Ishki ister, Qarjy jáne Aýyl sharýashylyǵy ministrlikterinde qalyptasty.
«Igerilmeýdiń negizgi sebepteri: sharttardy, qosymsha kelisimderdi uzaq rásimdeý, biýdjettik baǵdarlamalardy iske asyrý jónindegi normativtik quqyqtyq aktilerdi der kezinde qabyldamaý, shot-faktýralar, atqarylǵan jumys aktileriniń ýaqytyly ótkizilmeýi, esepti aida qarajatty jumsaý qajettiliginiń bolmaýy», - dedi Erulan Jamaýbaev.
