Foto: Videodan skrinshot
Alataý qalasyna qarasty Dáýlet aýylynda 70-ten astam otbasy baspanasynan aiyrylyp qalý qaýpinde tur. Buǵan sebep – osydan on jyl buryn rásimdelgen jer telimderiniń qujattary jalǵan bolyp shyǵýy. Kei turǵyndarǵa úileriniń súriletini týraly eskertý jasalǵan, dep habarlaidy Ult.kz KTK arnasyna silteme jasap.
Turǵyndardyń aitýynsha, olar on jyldan beri jer men úi qujattaryn tolyq rásimdei almai keledi. Sonyń saldarynan aýylda infraqurylym máselesi sheshilmegen: jaryq, gaz, jol joq, al turǵyndardyń kópshiligi áli kúnge deiin tirkeýge tura almaǵan.
«Úidiń qujatyn ala almai júrgenime 10 jyl boldy. Balalarym tirkeýde joq, gaz da, sý da joq. Qaida barsaq ta, “erteń” dep shyǵaryp salady», – deidi turǵyn Naýryzhan Qalash.
Al Mádina Baidolla jer qujattarynyń jalǵan ekenin tek eki jyl buryn bilgen. Onyń aitýynsha, úiine 15–20 million teńge jumsaǵan. Endi baspanasynan aiyrylyp qalsa, balalarymen qaida bararyn bilmeidi.
«Eki balam bar, taǵy da bosanaiyn dep otyrmyn. Eger úidi tartyp alsa, barar jerim joq. Tirkeý bolmaǵan soń, emhanaǵa da, basqa qyzmetterge de qol jetkize almai otyrmyz», – deidi ol.
Tirkeýdiń joqtyǵy turǵyndardyń áleýmettik quqyqtaryna da áser etken: balalaryn mektepke ornalastyrý, meditsinalyq kómek alý qiynǵa soǵyp otyr. Qujat máselesin kótergende, turǵyndardyń aitýynsha, túrli memlekettik organdar jaýapkershilikti bir-birine silteidi.
Al jergilikti ákimdik máseleni birjaqty sheshe almaitynyn málimdedi. Sheneýnikterdiń aitýynsha, kei turǵyndar jerdi tolyq rásimdemei, qurylys jumystaryn bastap ketken.
«Keibiriniń jalǵa alý merzimi ótip ketken, keibiri memlekettik aktini almaǵan. Biz saraptama júrgizdik. Qazir berer keńes – máseleni tek sot arqyly zańdastyrý. Múmkin arnaiy komissiia qurylyp, oń sheshim qabyldanar, biraq ázirge basqa jol joq», – dedi Alataý qalasy sáýlet jáne qala qurylysy bóliminiń basshysy Nurdos Syldyrbaev.
Qazir turǵyndar jalǵyz baspanasynan aiyrylyp qalmaýdyń jolyn izdep, ádil sheshim kútýde.
