Ulttyq bank jalǵan aqsha men shyn aqshany ajyratýdyń joldaryn jariialady, dep habarlaidy "Ult aqparat".
Bank mamandarynyń aitýynsha, qoldan aqsha jasaýshylar negizinen vizýaldy qorǵanysh elementterin imitatsiialaidy. Iaǵni, qoldan jasaý múmkin emes qorǵanysh elementterine uqsas beineler jasaidy.
«Bir qaraǵanda, olar shyn aqsha siiaqty bolýy múmkin, biraq banknotty muqiiat zerdelep kórgen kezde qoldan jasalǵanyn anyqtai alasyz. Túpnusqa banknottar aiqyn beinelerimen erekshelenedi, ańyzdaǵy Samuryq qusy túrindegi sý belgisi, nominaly, sondai-aq jaryq túsirgen kezde anyq kórinetin qorǵanysh jibi bar», - dep jazylǵan túsindirmede.
Shyn banknotty jalǵan aqshadan ajyratý úshin túpnusqadaǵy birneshe belgini bilý jetkilikti kórinedi. Elimizdegi jalǵan banknottardyń negizgi bóligi túpnusqanyń keibir belgilerin ǵana imitatsiialaityn jeńildetilgen tehnologiiamen shyǵarylady eken. Qoldan jasalǵan mundai banknotty arnaiy jabdyqtyń kómeginsiz-aq «sezin – qara – aýdaryp kór» ádisin qoldaný arqyly anyqtaýǵa bolady.
Iaǵni eń áýeli banknotty ustap seziný qajet.
«Banknot qaǵazy erekshe shytyrlaidy. Barlyq banknotta beder beretin arnaiy mór basylǵan. Eger «QAZAQSTAN ULTTYQ BANKI» degen ataýdy nemese Qazaqstan kartasyndaǵy arhitektýralyq beinelerdi saýsaqpen ustap kórse, bederdi sezýge bolady», - dep jazady Ulttyq bank manadary.
Sonymen qatar, barlyq banknotta kózi nashar kóretin adamdarǵa arnalǵan belgiler bar, olar banknottyń tómengi bóliginde ornalasqan. Bular – ustap kórgende jaqsy ajyratýǵa bolatyn joǵary bederli elementter.
Ekinshiden, banknotty muqiiat qaraý kerek.
«Bastapqyda aqsha belgisiniń taza, aiqyn, kontrasty nemese las bolýyn, daqtarynyń bolýyn jalpy kózben kórip zerdeleý qajet. Banknotty jaryqqa qaratyp, ańyzdaǵy samuryq qusy túrindegi sý belgisin jáne nominaldyń sandyq beinesin kórýge bolady. Dál osy siiaqty, jazýlary bar núktelik syzyqtar túrinde qaǵaz betinde paida bolatyn magnitti (metaldandyrylǵan) úzik jipti tekserý qajet. Ol birtutas bolýy kerek», - delingen túsindirmede.
Aqshanyń jalǵan emes ekenin anyqtaýdyń úshinshi joly - banknotty aýdaryp qaraý.
1000 teńgeden 20 000 teńgege deiingi banknottarda kólbeý buryshyna qarai túsin jasyldan altyn túske deiin ózgertetin erekshe element bar. Banknotty ár túrli buryshtarǵa baiaý burǵan kezde element boiymen tústi jolaqtyń qozǵalysyn kórýge bolady.
Sondai-aq, 2000 jáne 5000 teńgelik banknottardyń syrt jaǵynda golografiialyq jolaq bar. Gologrammadaǵy sýretter jarqyraidy jáne dinamikalyq áseri bar.
