Foto: Vox Populi
Almatydaǵy Kók bazardyń kásipkerleri bazar ákimshiligine narazy. Olardyń aitýynsha, bir ai buryn ákimshilik esh eskertýsiz saýda núktelerin tartyp alyp, úshinshi tulǵalarǵa bergen. Sondai-aq kelisimshartty birjaqty túrde buzdy dep otyr. Al bazar basshylyǵy bul málimdemelermen kelispeidi: olardyń sózinshe, kásipkerler shart talaptaryn ózderi buzǵan., dep habarlaidy31-arnanyń “Informbiýro” jańalyqtar baǵdarlamasy.
Kásipker Janar Raiymqulova Kók bazarda 10 jyldan beri saýdamen ainalysyp keledi. Kópbalaly ana otbasyn asyraý úshin kúndiz-túni jumys isteitinin aitady. Alaida, onyń aitýynsha, bir ai buryn bazar ákimshiligi saýda ornyn zańsyz tartyp alǵan.
“7 qyrkúiekte “zańsyz orynda tursyń” degen syltaýmen 5 ornymdy alyp qoidy. Biraq men bul oryndardy zańdy túrde jalǵa alyp, ýaqytynda tólem jasap otyrǵanmyn. Kelisimshartym da bolǵan. Ákimshilik “úlken kisiler keldi, myqty kisiler kerek” dep, ornymdy bosatýdy talap etti. Sonda meni kim qorǵaidy? Kópbalaly anamyn, Qazaqstan Respýblikasynyń azamaty retinde barlyq salyǵymdy tólep júrmin”, – deidi saýdager Janar Raiymqulova.
Saýdager Maqsat Qaliev te osyndai jaǵdaida qalǵan. Ol byltyr bazar ákimshiligimen bir jyldyq kelisimshartqa otyrǵanyn, ony ár 11 ai saiyn uzartýǵa keliskenin aitady. Alaida, kelisim merzimi aiaqtalǵan soń, ákimshilik shartty uzartýdan bas tartqan.
“Men bul oryndarǵa kóp qarjy saldym. Al endi bári dalada qaldy. Bul degen – óz bilgenin isteý ǵoi”, – deidi ol.
Osyǵan uqsas jaǵdaiǵa 30-ǵa jýyq saýdager tap bolǵan. Olar tabys kózinen aiyrylyp, endi óz quqyqtaryn qorǵaýdy talap etýde.
Al bazar ákimshiligi bul jaǵdaiǵa basqa kózqarasta. Olardyń málimetinshe, kásipkerler kelisimshart talaptaryn buzǵan. Atap aitqanda, jalǵa alynǵan oryndardy ústeme baǵamen ózgelerge qaita jalǵa bergen.
“Biz eshkimge eskertýsiz baryp, ornyn tartyp alǵan joqpyz. Resmi hat joldanyp, barlyq eskertý jasaldy. Sebebi de túsindirildi. Tekseris barysynda kásipkerler kelisimshartty óreskel buzǵany anyqtaldy. Olar jalǵa alǵan oryndaryn úshinshi tulǵalarǵa jalǵa bergen. Bul – kelisimshartqa qaishy. Sonymen qatar, ruqsat etilmegen oryndarǵa turyp alǵan satýshylar da boldy. Biz áreketimizdi zań aiasynda júzege asyrdyq”, – dedi saýda ornynyń zańgeri Nurlan Qadyrbaev.
Alaida saýdagerler bul aiyptaýlarmen kelispeidi. Olar eshkimge ornyn jalǵa bermegenderin aityp, saýda núktelerin qaitaryp berýdi talap etýde.
