Foto: gov.kz
Qazaqstanda eń tómengi jalaqyny kóterý máselesi áli de talqylaný ústinde. Eńbek jáne halyqty áleýmettik qorǵaý ministrligi bul jóninde túpkilikti sheshim jyl sońyna qarai jariialanatynyn málimdedi, dep habarlaidy Ult.kz.
Bul másele Senat otyrysynda Eńbek jáne halyqty áleýmettik qorǵaý birinshi vitse-ministri Erbol Tuiaqbaev tarapynan kóterildi. Onyń aitýynsha, qazirgi 85 myń teńgelik eń tómengi jalaqyny 150 myń teńgege deiin arttyrý týraly naqty sheshim ázirge qabyldanbaǵan.
Vitse-ministrdiń sózinshe, mundai sheshim bir ǵana vedomstvo deńgeiinde emes, biznes ókilderi, kásiporyndar men kásipodaqtardyń qatysýymen jan-jaqty qarastyrylýy tiis.
«Qazaqstandaǵy eń tómengi jalaqy mólsheri – 85 myń teńge. Biz bul deńgeige 5-6 jyl ishinde jettik. 2019–2020 jyldary ol shamamen 42 myń teńge bolatyn. Qazir qoǵamda ony kóterý týraly usynystar jii aitylyp júr. Alaida 150 myń teńgege birden kóterý ońai sheshim emes. Munda eńbek ónimdiligi, kásiporyndardyń jaǵdaiy, biznestiń múmkindigi sekildi faktorlar eskeriledi», – dedi ol.
Sonymen qatar, vitse-ministr elde shamamen 9,7 million adamnyń eńbek etetinin, olardyń basym bóligi jekemenshik sektorda jumys isteitinin atap ótti. Onyń aitýynsha, eń tómengi jalaqyny kúrt ósirý keibir kásiporyndarda jumys oryndarynyń qysqarýyna da áser etýi múmkin.
«Eger bizneske jalaqyny eki ese kóterý talabyn qoisaq, olar jumys oryndaryn qysqartýy yqtimal. Sondyqtan eń aldymen jumys oryndaryn saqtaý mańyzdy», – dedi Erbol Tuiaqbaev.
Ministrlik bul baǵytta kásipodaqtarmen, jumys berýshilermen jáne halyqaralyq eńbek uiymdarymen keńes júrgizip jatqanyn habarlady. Qazirgi tańda túrli usynystar qarastyrylýda, al naqty sheshim jyl sońynda jariialanýy múmkin.
