Bilim jáne ǵylym ministri Ashat Aimaǵambetov burynǵy vitse-ministr Fatima Jaqypovanyń dissertatsiiasyna qatysty pikir bildirdi, dep habarlaidy Sputnik Qazaqstan.
"Jalpy, bul dissertatsiia 2009 jyly Ál-Farabi atyndaǵy Qazaq Ulttyq ýniversitetinde qorǵalǵan. Sol ýaqyttaǵy barlyq talapqa sai dep sanaimyz. Sondyqtan búginde zańnama sheńberinde ol ǵylymi ataqty qaitaryp alýǵa múmkindigimiz bolmai tur", - dedi Aimaǵambetov senattyń plenarlyq otyrysynda.
Ministr senatorlardyń depýtattyq saýalyna aýyzsha jaýap berý úshin otyrysqa arnaiy keldi. Óz sózinde ol burynǵy vitse-ministr Fatima Jaqypovanyń óz erkimen jumystan ketkenin de eske saldy.
"Endi, jalpy bul kisini ózderińiz bilesizder, ótinishin jazdy. Sol ótinishtiń sheńberinde qazir ministrlikte jumys istemeidi", - dep atap kórsetti Aimaǵambetov.
Onyń aitýynsha, biyl Qazaqstan alǵash ret plagiatqa qarsy jańa júiege qosyldy. Ony álem boiynsha 15 myń úzdik ýniversitet paidalanady.
"Endi, barlyq kýrstyq jumys, diplom men dissertatsiia osy júieden ótetin bolady. Ol – bir. Ekinshiden, ǵylymi jumystar júieden ótip qana qoimai, sol júiede saqtalady. Sóitip, bir ret jazylǵan jumysty ekinshi ret qorǵaýǵa múmkindik bolmaidy", - dep atap kórsetti Aimaǵambetov.
Aita keteiik, buǵan deiin Senat depýtaty Edil Mamytbekov plagiat tóńiregindegi daýdan keiin bilim jáne ǵylym vitse-ministri Fatima Jaqypovany qyzmetinen bosatý máselesin qozǵaǵan bolatyn. Úkimet basshysy Asqar Maminge joldaǵan depýtattyq saýalynda Mamytbekov bilim salasynda qordalanǵan máselelerdi kóterdi. Sonyń biri - bilim jáne ǵylym ministriniń orynbasary Fatima Jaqypovanyń "jalǵan ǵalym" atanýy.
"Sizder bilesizder, bir aidan astam ýaqyt boiy otandyq BAQ pen sheteldik uiymdar qazaqstandyq vitse-ministrdiń plagiatyn talqylap jatyr. Qazir álemde moiyndalǵan eki antiplagiattyq júie basqa bireýdiń ǵylymi jumysyn paidalaný faktisin rastap otyr. Mundai jaǵdaida vedomstvolyq ulttyq memlekettik ǵylymi-tehnikalyq saraptama ortalyǵyn paidalanyp, qazaqstandyq qoǵamdy jańylystyrý - memlekettik qyzmetkerdiń etikalyq kodeksin buzý bolyp sanalady", - dedi depýtat.
Senat depýtaty "jalǵan ǵalym" dep aiyptalǵan vitse-ministrdiń áli de óz qyzmetinde júrgenin aitty.
"Nege áli kúnge deiin kadrlyq sheshim qabyldanǵan joq?", - dedi Mamytbekov.
Ertesinde bilim jáne ǵylym ministrli vitse-ministrdiń jumystan bosatylǵanyn habarlady.
