QR ishki ister ministriniń orynbasary Rashid Jaqypovtyń pikirinshe, qazaqstandyqtar politsiiaǵa júginýden qoryqpaidy, dep habarlaidy Sputnik Qazaqstan tilshisi.
"Bizdiń azamattar politsiiaǵa júginýge qorqady dep oilamaimyn. Kerisinshe, olar politseilerdiń ústinen shaǵymdanyp, bizden istiń egjei-tegjeiin anyqtaýdy surap jatady. Munyń ózi azamattardyń óz quqyqtaryn belsendirek qorǵap júrgeniniń aiqyn kórinisi dep oilaimyn", — dedi Jaqypov Astanada Denis Tenniń ólimine qatysty isti tergeý týraly baspasóz máslihatynda.
Ol qazaqstandyqtar politsiianyń jumysyn synap qana qoimai, olarǵa alǵys aityp jatatynyn da tilge tiek etti.
"Azamattar atqarylǵan jumys úshin politseilerge alǵys aitatyn faktilerdi de kóptep keltire alamyn. Muny da joqqa shyǵarýǵa bolmaidy. Sondyqtan Qazaqstan qoǵamy politsiiadan nemese politsiiaǵa júginýden qorqady dep aitpas edim. Keibir faktiler men áleýmettik jelilerde aitylatyn dúnie bizdiń qoǵamnyń beinesi emes. Desek te, biz politseilerdiń dórekilik tanytýy nemese isine nemquraily qaraýy faktileri boiynsha qatań tekseris júrgizemiz. Búginde bizge, shynymen de, oń kózqaras qalyptastyrý úshin halyqpen jumysty kúsheitip, politsiianyń jumysyn túsindirý kerek dep sanaimyn", — dedi Jaqypov.
