Prezident Qasym-Jomart Toqaev Joǵarǵy sot tóraǵasy Jaqyp Asanovtyń sot júiesiniń reformalanýy týraly esebin tyńdady, dep habarlaidy Aqordanyń baspasóz qyzmeti.
Joǵarǵy sot tóraǵasynyń aitýynsha, 2,5 jyl ishinde birqatar pilottyq jobalar júzege asyrylyp, 22 zań jobasy ázirlengen. Onyń ishinde 10 zań jobasy qabyldandy.
Sýdialyq kadrlar salasynda da ózgerister boldy. Atap aitqanda jańa sýdialardy irikteý maqsatynda tiimdi HR-tehnologiialar engizilgen, sýdialardyń tártiptik jaýapkershiligi, kadrlyq rezerv máseleleri Joǵarǵy sottan Joǵary sot keńesiniń qaraýyna berilgen, sondai-aq jumys istep júrgen sýdialardy baǵalaýdyń jańa institýty – Sot tóreliginiń sapasy jónindegi komissiianyń qyzmetine de ózgeris jasalǵan. Sonymen qatar Jaqyp Asanov jańa baǵalaý ádistemesi boiynsha 2022 jylǵa deiin sýdialardyń shamamen 80% attestatsiiadan ótetinin jetkizdi. Onyń aitýynsha, 2019 jyly attestatsiiaǵa qatysqan sýdialardyń 10% baǵalaýdyń jańa júiesinen óte almaǵan.
Budan bólek Memleket basshysyna aqtaý úkimderi sanynyń kúrt óskeni, ásirese, bul kórsetkish aýyr qylmystar boiynsha 12 ese, al asa aýyr qylmystar boiynsha 6 ese artqany aityldy.
Joǵarǵy sot tóraǵasy Qazaqstan Prezidentine Azamattyq protsessýaldyq kodekske engizilgen túzetýler biylǵy 22 maýsymnan bastap kúshine enetinin jáne ondaǵy ózgerister týraly baiandady.
Sonymen qatar ákimshilik ádilet máselesi týraly da sóz qozǵaldy. Atalǵan institýt Qazaqstanda Ákimshilik rásimdik-protsessýaldyq kodeksti qabyldaǵan soń engiziledi. Qazirgi ýaqytta ol Senattyń qaraýynda.
Joǵarǵy sot tóraǵasy Memleket basshysyna COVID-19 pandemiiasy kezeńindegi sottardyń jumysy týraly da aqparat berdi. Sondai-aq ol protseske qatysýshylardyń qaýipsizdigin qamtamasyz etý úshin barlyq qajetti sharalardyń qabyldanatynyn atap ótip, tótenshe jaǵdai kezeńinde jáne odan keiin de sot tóreligin júzege asyrý isi toqtamaǵanyn aitty.
Áńgimelesý qorytyndysy boiynsha Memleket basshysy sot júiesiniń aldyna birqatar naqty mindetter qoidy jáne qazirgi kúrdeli kezeńde sottardyń jumysy úzdiksiz jalǵasa beretindigine senim bildirdi.
