Foto: © Sputnik / Vladislav Vodnev
Mádeniet jáne aqparat ministri Aida Balaeva jazýshy Kemel Toqaevtyń 100 jyldyq mereitoiyn ótkizýge qatysty pikir bildirdi, dep habarlaidy Sputnik Qazaqstan.
Búgin ortalyq kommýnikatsiialar qyzmetinde jýrnalister jazýshy Kemel Toqaevtyń týǵanyna 100 jyl tolýyna arnalǵan konferentsiiany ótkizýge qatysty suraq qoidy. Sebebi áleýmettik jelide "osyndai jiyndar arqyly Prezidenttiń jeke basyna tabyný bar" degen pikirler tarady. Kókpar uiymdastyryldy, al QazUÝ-da Kemel Toqaevtyń aýditoriiasy ashyldy.
Ministrdiń aitýynsha, Kemel Toqaevqa Prezidenttiń ákesi retinde emes, aldymen belgili jazýshy retinde qaraý kerek.
"Menińshe, kishkentai aýditoriianyń ashylýyna qatysty osyndai daý-damaidyń bolǵany uiat nárse. Birinshiden, biz Kemel Toqaevtyń tulǵasyn Prezidenttiń ákesi retinde qabyldamaýymyz kerek. Ol kisi belgili jazýshy, qazaq detektiv janrynyń negizin qalaýshy, keńes úkimeti kezinde oqyrman izdep oqityn jazýshylardyń biri boldy. Jýrnalistika salasyna úlken eńbek sińirgen maidanger tulǵa. Ekinshiden, mundai sharalar kúnde jasalyp jatqan joq. Ol kisiniń 100 jyldyq mereitoiyna arnalyp otyr. Biyl Muzafar Álimbaev, Tahaýi Ahtanov jáne taǵy basqa jazýshylardyń mereitoiy atalyp ótedi", - dedi Balaeva.
Ministr kókparǵa memleket tarapynan aqsha bólinbegenin de aitty. Ony arnaiy qor uiymdastyrdy. Al Kemel Toqaevtyń 100 mereitoiyn ótkizý - jaǵympazdyq emes.
"Meniń oiymsha, mereitoi buryn da atalyp ótken. Biraq áleýmettik jeli bolmaǵannan keiin aqparat az boldy. Sodan kóbisi bilmei qaldy. 90 jyldyǵyna da kitaptary shyǵaryldy, konferentsiialar ótkizilgen. Jaǵympazdyq dep sanamaimyn. Onyń keregi de joq", - dep atap kórsetti Balaeva.
