Oblys ákimdiginde ótken toǵyz aidyń qorytyndylaryna arnalǵan alqaly jiynǵa barlyq deńgeidegi ákimder, memlekettik organdardyń basshylary, shaǵyn jáne orta biznes ókilderi, iri kompaniialardyń jetekshileri qatysty. Onda ekonomikanyń egiz salasy – ónerkásip pen aýyl sharýashylyǵynyń damý baǵyttary jáne ózekti máseleleri talqylanyp, áńgime ózegine ainaldy.
Jiyndy kirispe sóz sóilep ashqan oblys ákimi Berdibek Saparbaev qatysýshylar nazaryn áli de bolsa negizgi salalardyń kórsetkishteri tómen ekendigine, múmkindikter men rezervterdiń tiimdi paidalanylmai otyrǵanyna, ekonomikalyq taldaýdyń, baqylaý men tiimdilikti esepteýdiń jetispeitindigine aýdardy.
Óńirdiń ónerkásip salasyndaǵy atqarylǵan jumystar týraly baiandaǵan oblys ákiminiń orynbasary Asqar Biahmetov esepti merzim ishinde ónerkásip ónimderin óndirý kólemi 844,2 milliard teńgeni quraǵanyn, ónim kólemi indeksi ótken jyldyń osy kezeńimen salystyrǵanda, 97,5 paiyz bolǵanyn jetkizdi. Atalǵan kórsetkishterdiń tómendeýi Shalqar, Muǵaljar, Temir, Baiǵanin jáne Hromtaý aýdandarynda oryn alyp otyrǵanyn atap ótti. Naqty aitqanda, munai, metall rýdalaryn óndirýde, taý-ken ónerkásibiniń basqa da salalarynda, taý-ken óndirisi ónerkásibi salasyna tehnikalyq qyzmet kórsetý baǵytynda burynǵymen salystyrǵanda baiaýlyq baiqalýda. Óńdeýshi ónerkásipte 245,1 milliard teńgeniń ónimi óndirildi.
Ústimizdegi jyly óńirlik kásipkerlikti qoldaý kartasy aiasynda jalpy somasy 6,5 milliard teńgege 4 jobany igerý qolǵa alyndy. Osy oraida, úsh júzden astam jumys oryndary quryldy. «Sailan Aqtóbe» JShS «Hromiks» pigmentti-toltyrǵysh pen magnezialdy untaqtyń 6 myń tonnasyn shyǵarý múmkindigine ie tseh jobasyn qolǵa aldy. «Tehnodom ST-KZ» JShS tirkeme tehnikasyn shyǵaratyn zaýytty keńeitýde. Bul jobanyń quny 600 million teńge quraidy. «QazInRýsstreiding» JShS-niń az tonnaly munai óńdeýshi zaýyty men nemis tehnologiiasy boiynsha jumys isteitin úi qurylysy kombinaty óńir ónerkásibin damytýǵa serpin beredi dep kútilýde.
Shaǵyn jáne orta biznes damytylýda. Bul salada eńbek etetinder sany 51 myń birlikti quraidy, al bólshek taýar ainalymy kólemi 215,7 milliard teńgege jetti.
Oblys boiynsha jumyssyzdyq deńgeii qazirgi ýaqytta 4,9 paiyzdy qurap otyr. 21672 adam jumyspen qamtamasyz etildi. Jergilikti biýdjet qarjysy esebinen 7604 adam qoǵamdyq jumystarǵa tartyldy.
Oblys ákimi Berdibek Saparbaev alqaly jiyndy qorytyndylai kele, ónerkásip salasynda eseptiliktiń tómendigin, sondai-aq, indýstriialyq aimaqtyń múmkindigi tiimdi paidalanylmai otyrǵanyn synǵa aldy. Qol qoiylǵan memorandýmdardy ilgeri aparýǵa baqylaý jetispeitindigine, shaǵyn jáne orta biznes nysandarynda ashyqtyqtyń qamtamasyz etilmeitinine, salyqtan jaltarýshylyq kezdesip qalatynyna, investitsiia tartý kózderin tabýdyń kóńildegidei bolmai otyrǵanyna nazar aýdardy.
Ol aýyl sharýashylyǵy salasynda maldyń ósýi oǵan bólingen memlekettik qoldaý qarjylarynan anaǵurlym keiin qalyp otyrǵany saladaǵy alǵa basýshylyqty tejep otyrǵanyn atap ótti. «Sybaǵa», «Altyn asyq», «Qulan» jáne «Yrys» memlekettik baǵdarlamalarynyń múmkindikterin áli de bolsa jetkilikti túrde paidalana almai otyrǵanyna qynjylys bildirdi. Súdiger jyrtý jáne kúzgi daqyldardy egýde baiaýlyq bar ekenin de jasyrmady.
Alystaǵy aýyldarǵa baǵdarlamanyń mán-maǵynasy jetkizile bermeidi, túsindirý jumystary nashar, degen Berdibek Máshbekuly aýdandarda óńdeý kásiporyndarynyń jumys istemeitindigin de synǵa aldy.
Óńir basshysynyń talap pen tártipti birinshi kezekke qoiýy bosańsyp ketkenderdi shiraq qimyldap, izdenispen jumys isteýge yqpal etedi degen úmitpen tarasty jurt.
Satybaldy SÁÝIRBAI,
«Egemen Qazaqstan»
Aqtóbe oblysy
.jpeg)