Foto: ashyq derekkóz
Aqmola oblysynda zeinetkerlerdi aldap, olardyń atyna nesie rásimdegen áiel qylmystyq jaýaptylyqqa tartyldy. Bul týraly Aqmola oblysy prokýratýrasy habarlady.
Sandyqtaý aýdandyq sotynda aýyldyq eldi mekenderdiń biriniń turǵynyna qatysty qylmystyq is qaraldy. Tergeý barysynda sottalýshynyń kórshilerimen jáne jergilikti zeinetkerlermen senimdi qarym-qatynas ornatyp, olardy jańylystyrý arqyly áleýmettik tólemder men túrli qyzmetterdi rásimdeýge kómektesemin dep aldaǵany anyqtalǵan.
Osylaisha ol jábirlenýshilerdiń qujattaryna, jeke derekterine jáne uialy telefondaryna qol jetkizip, olardyń habarynsyz bank nesielerin rásimdegen. Alynǵan qarajatty óz paidasyna jumsap, zeinetkerlerge jalpy somasy 7 mln teńgeden astam materialdyq shyǵyn keltirgen.
Sot úkimimen kináli tulǵa Qylmystyq kodekstiń «Alaiaqtyq» babymen kináli dep tanylyp, 2 jyl 4 ai merzimge bas bostandyǵynan aiyryldy.
Prokýratýra mundai quqyqbuzýshylyqtardyń aldyn alý maqsatynda halyqpen kezdesýler ótkizý jáne memlekettik organdarmen ózara is-qimyl arqyly profilaktikalyq jumystardy kúsheitip jatqanyn atap ótti.
