«Otbasy banki» AQ ortalyq filialynyń direktory Jansultan Mataev zeinetaqynyń bir bóligine ótinim berýden bastap paidaǵa jaratýǵa deiingi algoritm jariialady, dep habarlaidy QazAqparat.
«Búgingi tańda Otbasy bankimen qatar, Halyq banki de ókiletti organ retinde osymen jumys isteitinin (zeinetaqynyń bir bóligin alý isimen) jariialap otyr. Olar da arnaiy esepshottardy ashyp jatyr», - dedi Jansultan Mataev Ortalyq kommýnikatsiialar qyzmetiniń alańynda ótken baspasóz máslihatynda.
Bank ókili óz sózinde ótinimdi berilgennen keiingi jumys algoritmi qalai bolatynyn túsindirdi.
«Osy baǵdarlamaǵa qatysqysy keletin azamattar biryńǵai zeinetaqy jinaǵy qoryndaǵy óziniń jinaǵyn esepteýi kerek. Odan keiin «Otbasy bankinde» nemese óz qalaýy boiynsha ekinshi deńgeili bankterden arnaiy shot ashýy kerek. Úshinshi qadam: erteń, iaǵni 23 qańtardan saǵat tańerteńgi 09.00-de «Otbasy bankte» portaly ashylady. Sol portalǵa azamattar óziniń elektrondy qoltańbasy arqyly kiredi. Ol portalǵa azamattar jetkilikti deńgeiden artyq somany qai maqsatqa paidalanatynyn kórsetip, ótinim beredi. Al ótinim zeinetaqy qoryna joldanady. Bes kúnniń ishinde ol jaqtan jaýap kelip, maquldanǵannan keiin azamat «Otbasy banktiń» portaly arqyly rastaityn qujattardy tirkep, arnaiy esepshotyndaǵy aqshany ózi kórsetken rekvizitter boiynsha satyp alýshyǵa, ne bolmasa ipotekany óteýge joldaidy», - dedi ol.
