Biryńǵai jinaqtaýshy zeinetaqy qorynyń mamandary qor saityndaǵy eń tanymal servisterdiń birin jańartty, dep habarlaidy QazAqparat tilshisi.
«Boljamdy zeinetaqy kalkýliatory BJZQ-nyń árbir salymshysyna óziniń bolashaq zeinetaqy tólemderiniń mólsherin anyqtaýǵa kómektesedi. Bul rette ol memlekettik bazalyq zeinetaqy men jasyna bailanysty ortaq zeinetaqyny jáne BJZQ tólemderin qatar kórsetedi. Odan basqa mindetti zeinetaqy jarnalary (MZJ), mindetti kásiptik zeinetaqy jarnalary (MKZJ) jáne erikti zeinetaqy jarnalary (EZJ) boiynsha ashylǵan shottardaǵy qarajatty qosyp, jalpy somasyn shyǵarady», - delingen Qor habarlamasynda.
Esepteý qorytyndysy: pessimistik, realistik jáne optimistik stsenarii boiynsha shyǵarylady. Barlyq úsh nusqada infliatsiianyń kútiletin deńgeii men tabystylyq esepke alynady.
Atap ótý kerek, kalkýliatordyń jańa nusqasyna mindetti kásiptik zeinetaqy jarnalary men erikti zeinetaqy jarnalary boiynsha tólemder qosyldy. Buryn olar joq bolatyn. Bul rette erikti zeinetaqy jarnalaryn tabystyń belgili bir paiyzy retinde emes, naqty somasy boiynsha kórsetýge bolady.
Zeinetaqynyń boljamdy mólsherin esepteý úshin tiisti baǵandarǵa týǵan kúndi, jynysty, eńbek ótilin, jinaqtaýshy zeinetaqy júiesine qatysý ýaqytyn, zeinetaqy jinaqtarynyń jalpy somasyn jáne jalaqyny engizseńiz bolǵany.
Eger Siz zeinetaqy kalkýliatoryn Qordyń enpf.kz saitynyń Jeke kabineti arqyly ashatyn bolsańyz, jinaqtardyń somasy avtomatty túrde engiziledi.
Qor mamandary kalkýliatordy anaǵurlym yńǵaily ete otyryp, kórneki syzbasyn jańartty. Endi jańartylǵan zeinetaqy kalkýliatoryndaǵy qorytyndy nátijeler kórneki syzba men tólemder kestesiniń kómegimen kórsetiledi.
Barlyq boljamdy nátijeler tiisti kezeńdegi infliatsiiany shegere otyryp, naqty qundyq shamada kórsetiledi. Zeinetaqy kalkýliatoryn paidalaný óte ońai. Alaida eger qandai da bir qiyndyqtar nemese suraqtar týyndasa, enpf.kz saitynda arnaiy jadynamamen tanysýǵa bolady. Onda kalkýliatordy paidalanýdyń naqty nusqaýlyǵy kórsetilgen.
