Búginde qazaqstandyqtar zeinetaqy jinaǵy qoryndaǵy tólemniń belgili bir bóligin baspana alýǵa jáne emdelýge jumsai alady. Osy oraida kópshilikti zeinetaqy qory jinaǵyndaǵy tólemge alynǵan úidi satýǵa nemese syiǵa tartýǵa bola ma degen suraq tolǵandyrady.
Bul suraqqa «Otbasy bank» AQ-nyń baspasóz hatshysy Janar Joltaeva jaýap berdi, dep habarlaidy QazAqparat.
«Zeinetaqy jinaǵyna turǵyn úi satyp alǵan azamattar atalǵan múlikti 5 jylǵa deiin sata almaidy degen talap bar. Bul talap zeinetaqy jinaǵyndaǵy somany qolma-qol aqshaǵa ainaldyrý, alyp-satýmen ainalysýdyń jáne baspana baǵasynyń negizsiz ósýiniń aldyn alý úshin engizildi. Iaǵni biyl 23 qańtardan keiin óteý merzimi 5 jyldan asatyn ipotekalyq zaim rásimdelip, alǵashqy jarna retinde birjolǵy zeinetaqy tólemi paidalanylsa, onda ol turǵyn úidi satýǵa ruqsat joq. Alaida ipotekalyq zaimdy óteý merzimi týra 5 jyl nemese odan az bolsa onda iesi úidi sata alady. Sondai-aq, turǵyn úidiń alǵashqy jarnasy ótinish berýshiniń jeke qarajatymen ótelip, qalǵany ipoteka arqyly ishinara zeinetaqy jinaǵy qoldanylsa ol jaǵdaida baspana iesiniń satý quqyǵy bar. Satýdan bólek, úidi óz jaqyndaryna syiǵa da bere alady», - dedi Janar Joltaeva.
Onyń aitýynsha, zeinetaqy jinaǵynyń bir bóligin jumsaýda adamnyń jas ereksheligi mańyzdy emes. Bastysy azamattyń kámelet jasynda bolýy.
«Karantinge bailanysty bankte adamdardyń shoǵyrlanýyna jol bermeý úshin, barlyq jumys onlain júrip jatyr. Sol úshin de zeinetaqy jinaǵyn tólemdi alýǵa arnalǵan arnaiy platforma iske qosyldy. Iaǵni ótinish berýden bastap, barlyq rásimdeý, jeke málimetterdi engizý sekildi protsester tolyqtai sait arqyly úide otyryp ta júzege asyrýǵa bolady», - deidi ol.
