Қазақстан Тәуелсіздігіне 25 жыл

Áliia Moldaǵulovanyń maidanǵa attanar aldyndaǵy sýretin kim saqtaǵan?

Áliia Moldaǵulovanyń maidanǵa attanar aldyndaǵy sýretin kim saqtaǵan?
Foto: Neirojeli arqyly jasaldy

Basynda juldyzdy pilotka, shashy burym etip órilgen. Mýzei qyzmetkerleriniń aitýynsha, Áliia Moldaǵulova bul sýretke maidanǵa attanar aldynda, 17 jasynda túsken. Ol fotosyn bir hatqa qosyp, aýyldaǵy qurbysyna jiberipti. Hattar saqtalmaǵanymen, sýret sol otbasynyń albomynda qalǵan. Onyń tarihyn Qobda mýzeiiniń qyzmetkeri Gúlbarshyn Erǵalieva 2021 jyly QazAqparatqa⁠ aityp berdi, dep habarlaidy ult.kz.

Áliia sýretin kimge jibergen?

Sýret Áliianyń bala kúngi qurbysy Bátima Órbisinqyzyna arnalǵan. Ekeýi Qobda óńirinde qatar ósken. Gúlbarshyn Erǵalievanyń aitýynsha, Áliianyń otbasy el basyna kún týǵan jyldary Bátimanyń ákesi Órbisinniń shańyraǵyn panalaǵan. Qyzdar sol úide bir dastarqannan dám tatyp, apaly-sińlidei jaqyn bolyp ketken. 

Keiin Áliia aýyldan jyraq ketse de, Bátimamen hat jazysyp turǵan. Aýyldyń hal-jaǵdaiyn, eldiń turmysyn surap otyrǵan. Bir joly hatyna óziniń sýretin qosyp jibergen. Mýzei qyzmetkeriniń sózinshe, bul fotosýret komsomol biletine túsý úshin túsirilgen, al Áliia ony Bátimaǵa estelikke joldaǵan. 

Sýret Mámbetovter otbasynda qalai saqtaldy?

Bátima keiin muǵalim bolyp, Qobda aýdanyndaǵy aýyl balalaryna sabaq bergen. Náribai Mámbetovpen shańyraq kóterip, bes bala tárbielegen. Balalary anasynan erte aiyrylǵan. Áliianyń Bátimaǵa jazǵan hattary sol kúii saqtalmai qalǵan, al hatpen kelgen fotosýret otbasynyń jeke muraǵatynda qalǵan. 

Sýretti Bátimanyń urpaqtary saqtaǵan. 2021 jyly Qobdaǵa kelgen uly Batyr Náribaiuly Mámbetov mýzei qyzmetkerimen áńgimelesip otyryp, anasynyń muraǵatynda Áliianyń buryn jariialanbaǵan sýreti baryn aitady. Onyń aitýynsha, anasynyń estelikteri men muraǵaty Qaraǵandy oblysynda turatyn qaryndasy Áliiada saqtalǵan. Osy áńgimeden keiin mýzei qyzmetkeri Bátimanyń qyzdary Áliia men Mánshúkke habarlasqan. 

Otbasy albomynan mýzeige jetken jádiger

Gúlbarshyn Erǵalieva Bátimanyń qyzdarynan sýretti kópshilikke kórsetýge ruqsat suraǵan. Keiin foto Qobdadaǵy tarihi-ólketaný mýzeiiniń “Dańq” buryshyna qoiyldy. Osylaisha otbasynda ondaǵan jyl saqtalǵan sýretti mýzeige kelgen jurt ta kóre alatyn boldy. 

Fotodaǵy Áliianyń shashy áli uzyn, burymy anyq kórinedi. Osy bir belgi sýretti jurt kóp kórgen, shashy qysqa mergen Áliianyń beinesinen daralap tur. Al fotosýrettiń kimge joldanǵanyn Bátimanyń balalary aityp bermegende, onyń aýyldaǵy qurbysyna jiberilgen estelik ekenin kópshilik bilmes edi.