«Otbasy» banki enpf-otbasy.kz onlain-platformasynyń jumysyn túsindirdi, dep habarlandy banktiń jelidegi paraqshasynda.
«Enpf-otbasy.kz onlain-platformasyndaǵy sizderdiń ótinimderińiz joiylsa nemese júie somany dóńgelektýińizdi surasa, onda bul birneshe sebepterge bailanysty bolýy múmkin:
1. Eger qajet soma «0» dep kórsetilse, onda sizdiń ótinimińiz joiylady;
2. Eger qarajat somasy qosymsha belgilermen kórsetilse.
Mysaly, «1.000.000» nemese «1000000,00» túrindegi somalardy júie qabyldamai, dóńgelektýdi suraidy.
Iaǵni somany qosymsha belgilersiz «1000000» nemese «1234567» túrinde kórsetý kerek», - dedi bank.
Eger siz bárin durys engizgen bolsańyz, júieni jańartý nemese qaita kirý kerek.
Onlain platformada jumys jasaý úshin sizge qoldanystaǵy ETsQ jáne nclayer sertifikaty qajet. Sertifikattardy Pki.gov.kz saitynan júktep alsańyz bolady.
Zeinetaqy jinaqtaryn alý boiynsha barlyq is – sharalar tek kompiýterden nemese noýtbýkten táýlik boiy qoljetimdi.
Eske salsaq, 2 qańtarda QR Prezidenti Qasym-Jomart Toqaev zeinetaqy jinaǵynyń bir bóligin maqsatty paidalanýǵa qatysty zańǵa qol qoidy.
Qazaqstandyqtardyń zeinetaqy jinaqtaryn paidalaný úshin jańartylǵan «jetkiliktilik shegi» jariialandy. Zeinetaqy jinaǵynan alýǵa bolatyn soma BJZQ saitynda avtomatty túrde kórsetiledi.
23 qańtardan Qazaqstanda zeinetaqynyń bir bóligin alýǵa ótinim qabyldaý bastaldy. Arnaiy portalda zeinetaqynyń bir bóligin alýǵa ótinim qabyldaý bastalǵaly úsh saǵattyń ishinde 4 myńnan astam adam ótinish berdi.
