QR Ulttyq bank tóraǵasynyń orynbasary Oleg Smoliakov Biryńǵai jinaqtaýshy zeinetaqy qorynyń aqshasyn baspanaǵa nemese kreditti jabý úshin paidalanýǵa qatysty pikir bildirdi, dep habarlaidy Sputnik Qazaqstan tilshisi.
"Men ózim zeinetaqy jinaqtaryn kreditti jabý úshin paidalanýǵa qarsymyn. Bul – meniń jeke pikirim. Iá, neshe túrli jaǵdailar bolady. Qarjylai qiyndyqtar bolǵanda nesie alýǵa týra keledi. Kepildik te bar. Al kreditti aqshamen, ia bolmasa, kepildikpen óteý kerek. Biraq BJZQ-daǵy jinaqtar zeinetke shyqqannan keiin kerek qoi. Máselen, ol aqshany paidalanýǵa ruqsat berilse, nesie alǵan adam zeinetaqy jinaqtaryn jumsap, kepildikten de airylýy múmkin. Menińshe, ondai jaǵdaida zeinetaqy jinaqtaryn kreditti jabý úshin paidalanǵan qisynsyz siiaqty", - dedi Smoliakov jýrnalisterge bergen suhbatynda.
Onyń aitýynsha, barlyq qazaqstandyqtardyń zeinetaqy jinaqtary birdei emes. Al ony basqa maqsattarǵa paidalanýǵa ruqsat berilse, bireýler zeinetaqysyz qalýy ábden múmkin.
"Negizi, osy máselelerdiń bári pysyqtalýda. Jalpy, zeinetaqy júiesine qatysty jumystar atqarylyp jatyr. Iá, onyń bárin qarastyryp jatqanymyzǵa biraz ýaqyt boldy. Degenmen, kúzge taman aldyn ala qorytyndy bolady degen oidamyn", - deidi Ulttyq bank tóraǵasynyń orynbasary.
