Endi Qazaqstandyqtar Biryńǵai jinaqtaýshy zeinetaqy qoryndaǵy jeke jinaqtarynyń jai-kúiin sms arqyly bile alady. Bul týraly atalǵan qordan málim etti, dep habarlaidy "Ult aqparat".
«BJZQ» AQ 2019 jyldyń 25 qańtarynan bastap Qazaqstan Respýblikasy Ulttyq bankiniń 2018 jylǵy 11 qarashadaǵy №288 qaýlysynyń kúshine enetindigin habarlaidy. Oǵan sáikes «Biryńǵai jinaqtaýshy zeinetaqy qory salymshysynyń (alýshysynyń) zeinetaqy jinaqtarynyń (investitsiialyq tabysty eskere otyryp) jai-kúii týraly aqparat berý» memlekettik qyzmeti elektrondyq úkimet portalynda endi elektrondyq tsifrlyq qoltańbanyń kómeginsiz de qoljetimdi bolady», - dep atap ótedi qordan.
Búginde zeinetaqy jinaqtarynyń jai-kúiin mynadai birneshe tásilmen bilýge bolady: BJZQ keńsesine tikelei kelip ótinish jasaý; dástúrli poshta bailanysy; elektrondyq tásil, onyń ishinde: BJZQ-ǵa usynylǵan jeke elektrondyq mekenjai; login jáne qupiia sóz nemese elektrondyq tsifrlyq qoltańbany qoldana otyryp, BJZQ portalyndaǵy jeke kabinet; elektrondyq úkimet portalyndaǵy jeke kabinet arqyly.
Aita keterligi, sońǵy habarlaý tásilin qoldaný úshin tek elektrondyq tsifrlyq qoltańba qajet bolatyn. Endi, ústimizdegi 25 qańtardan bastap kez kelgen salymshy (alýshy) bir rettik SMS-paroldi qoldana otyryp, jeke zeinetaqy shotynan úzindi kóshirme ala alady. Bul úshin salymshy (alýshy) elektrondyq úkimet portalynyń jeke kabinetinde tirkelip, úzindi kóshirme alýǵa saýal joldaidy. Sodan keiin mGov mobildik azamattar bazasynda tirkelgen salymshynyń (alýshynyń) uialy telefonyna bir rettik SMS-parol jiberiledi.
Jeke zeinetaqy shotynan úzindi kóshirmeni elektrondyq tásilmen alǵan óte yńǵaily. Bul zeinetaqy jinaqtary týraly mańyzdy aqparattardy 24/7 rejiminde alýǵa múmkindik beredi.
