Biryńǵai jinaqtaýshy zeinetaqy qorynyń qyzmetkerleri suraýsyz qalǵan 675 myń zeinetaqy shottarynyń ielerimen bailanys ornatty, dep habarlaidy QazAqparat tilshisi.
Bul bir jyl jáne odan da kóp jyldardan beri jarna túspegen qaraýsyz qalǵan shottar.
«Olardyń qatarynda ózin-ózi jumyspen qamtýshylar, jumyssyzdar, sondai-aq zeinetaqy jarnalaryn ýaqytsha aýdarmaǵandar: úide bir jyldan astam ýaqyttan beri dekrettik demalysta otyrǵandar, tájiribe jumysyndaǵylar, taǵylymdamadan ótýshiler, úi sharýasyndaǵy áielder, múgedektigi bar adamdar, áskeri qyzmetshiler men sottalǵandardyń shottary bar», – delingen BJZQ tartqan habarlamada.
Qor mamandary túsindirý jumystary aiasynda salymshylarǵa mindetti zeinetaqy jarnalaryn aýdarýdyń mańyzdylyǵyn túsindirdi. Sonyń arqasynda 128 myń jeke zeinetaqy shotyna jalpy somasy 4 mlrd teńgege 523 202 jarna kelip tústi. Sonymen qatar, qor sońǵy jyldary shottaryna zeinetaqy jarnasyn aýdarmai júrgen salymshylardy izdestirý jumystaryn odan ári jalǵastyryp jatyr.
