Foto: Tengrinews.kz / Týrar Kazangapov
BJZQ-dan beriletin tólemder boiynsha 2025 jyly qandai ózgerister bolatyny aityldy, - dep habarlaidy Tengrinews.kzke silteme jasap Ult.kz habarlaidy.
Eńbek sińirgen demalysqa 2025 jylǵa deiin shyqqan zeinetkerlerge BJZQ-dan tólenetin zeinetaqy tólemderiniń mólsheri 1 qańtardan bastap 5 paiyzǵa ulǵaiady.
"Esterińizge sala keteiik, BJZQ-dan beriletin tólemder Qazaqstan Respýblikasy Úkimetiniń 2023 jylǵy 30 maýsymdaǵy qaýlysymen bekitilgen Zeinetaqy tólemderiniń mólsherin esepteý ádistemesine sáikes júzege asyrylady. Ádistemege sai, zeinetke shyǵatyn azamattarǵa ai saiyn beriletin tólem bylai esepteledi: tólem ala bastaityn alǵashqy jyly zeinetaqy jinaqtarynyń somasy zeinetaqy jinaqtarynyń 6,5 paiyz tólem mólsherlemesine kóbeitilip, 12-ge bólinedi. Odan keiingi jyldary ai saiynǵy tólem zeinetaqy tólemderin indeksteýdiń 5 paiyz mólsherlemesine ulǵaiyp otyrady. Bul rette BJZQ-dan beriletin ai saiynǵy tólem respýblikalyq biýdjet týraly zańda tiisti qarjy jylyna belgilengen eń tómengi kúnkóris deńgeiiniń (budan ári - KD) keminde 70 paiyz mólsherinde júzege asyrylady (2025 jylǵy eń tómengi kúnkóris deńgeii - 46 228 teńge)", - delingen habarlamada.
Merzimsiz ýaqytqa belgilengen 1 nemese 2 toptaǵy múgedektigi bar adamdar, sondai-aq ziiandy jáne qaýipti óndiristerde jumys istep, zeinet jasyna tolǵan, olardyń paidasyna jiyntyǵynda kem degende alpys ai mindetti kásiptik zeinetaqy jarnalary tólengen adamdar siiaqty belgili bir sanattaǵy alýshylar úshin Ádistemede ai saiynǵy zeinetaqy tóleminiń mólsherin arttyratyn túzetý koeffitsientteri kózdelgen. Joǵaryda kórsetilgen sharttardyń bireýinen artyǵyn qanaǵattandyratyn adamdar úshin eń úlken mánge ie túzetý koeffitsienti qoldanylady.
"BJZQ-dan beriletin zeinetaqy tólemderi jeke zeinetaqy shotyndaǵy zeinetaqy jinaqtary taýsylǵanǵa deiin júzege asyrylady", - delinegen habarlamada.
