Jetisai aýdanynda ótken toidaǵy qariianyń aitqan sózi áleýmettik jelide keńinen tarap, qyzý pikirtalas týdyrdy, dep habarlaidy ult.kz.
Beinejazbada kópshilik aldyna shyqqan er adam jas jubailarǵa tilek aitýdyń ornyna ýaǵyz aityp, qazirgi toi ótkizý dástúrine qatysty óz pikirin bildirgen. Ol búginde toilarda araq qoiylmaitynyn oń ózgeris retinde baǵalap, endi taǵy eki máseleni ózgertý qajet ekenin aitty.
Onyń sózinshe, toilarda mýzykany alyp tastap, erler men áielderdi bólek otyrǵyzý kerek. Sonymen qatar ol toiǵa kelgen ánshilerdi «shaitannyń azanshysy» dep ataǵan.
Qariianyń áielderdi «urǵashylar» dep ataýy da kópshiliktiń narazylyǵyn týdyrdy. Áleýmettik jeli qoldanýshylary mundai sózdiń orynsyz ekenin aityp, toidyń basty maqsaty jas jubailarǵa izgi tilek aityp, qýanyshtaryn bólisý ekenin jazýda.
Jelide taraǵan videoǵa qatysty pikirler ekige jarylǵan. Biri qariianyń dini ustanymyna qurmetpen qaraý kerek dese, endi biri mundai ýaǵyzdyń toi ústinde aitylýyn orynsyz dep baǵalady.
