Búgin Aqmola oblysy Zerendi aýdanynyń Aqadyr aýylynda qatty jel turyp, 8 úidiń shatyryn ushyryp áketti, dep habarlaidy QazAqparat oblystyq TJD baspasóz qyzmetine silteme jasap.
«Zerendi aýdanynyń Aqadyr aýylynda ekpini 23 m/s deiingi qatty jel saldarynan jalpy aýdany 300 sharshy metr bolatyn 8 jeke turǵyn úidiń shatyrlary ishinara buzyldy», - dep habarlady Aqmola oblysy TJD baspasóz qyzmetinen.
Aqadyr, Uialy, Eńbek-Birlik aýyldarynda elektr berý jelileri úzilip, 247 abonentti elektrmen jabdyqtaý toqtatyldy. Oqiǵa ornynda «Qýat energopartner» JShS brigadasy, 1 tehnika jáne 5 adam jumyldyryldy. Adamdar aman.
«Qazirgi ýaqytta eldi mekenderde elektrmen jabdyqtaýdy qalpyna keltirý jumystary júrgizilip jatyr. Jergilikti atqarýshy organdardyń arnaiy komissiiasy jelden zardap shekken jeke turǵyn úilerdiń ielerine keltirilgen zalaldy óteý boiynsha sheshim qabyldaidy», – dep atap ótti oblystyq TJD bastyǵynyń orynbasary Qairat Qasym.
Aqmola oblysynyń Tótenshe jaǵdailar departamenti oblys turǵyndary men qonaqtaryna daýyl kezinde kelesidei tártip erejelerin saqtaý qajettigin eskertedi:
- Úige qulap ketpes úshin qýraǵan aǵashtardy jáne aǵash butaqtaryn aldyn ala kesip tastańyz;
- Barlyq qurylystardy, ásirese ýaqytsha úilerdi jerge myqtap bekitińiz;
- Daýyl kesirinen otbasy músheleri ár túrli jerlerde qalyp qalsa nemese úii qirap qalsa, búkil otbasy úshin kezdesý ornyn belgileńiz;
- Eger úide bolsańyz, tereze áinekterin kóldeneń nemese juldyz tárizdi bekitilgen jabysqaq taspamen kúsheitińiz. Jel nemese sý alyp ketýi múmkin barlyq zattar men jihazdardy úige kirgizińiz, maldy qaýipsiz jerge aidap, sol jerge jem men sý qaldyryńyz.
