Foto:bbc.com
Jeksenbi, 12 qańtar kúni Ýkraina prezidenti Vladimir Zelenskii Kiev qolyna túsken Soltústik Koreia sarbazdaryn Resei tutqynyndaǵy ýkraindarǵa almastyrýǵa daiyn ekenin aitty dep habarlaidy Ult.kz Azattyq radiosyna silteme jasap.
Zelenskii Soltústik Koreia sarbazdary Ýkraina qolyna alǵash ret túskenin, biraq budan ári mundai tutqyndar sany ulǵaia beretinin málimdedi.
Soltústik Koreianyń eki sarbazy ustalǵanyn Ýkraina basshysy senbi kúni aitqan.
Phenian áskeri Ýkrainadaǵy soǵysqa Resei jaǵynda jumyldyrylǵany byltyr kúzde málim bolǵan. Ýkraina men Batys elderiniń barlaýynsha, Soltústik Koreia 11 myń áskerin Reseidiń Kýrsk oblysyna joldaǵan. Resei muny rastaǵan da joq, teristegen de joq.
Zelenskii buǵan deiin Resei jáne Soltústik Koreia kúshteri kóp adamynan aiyrylyp jatyr dep málimdegen.
"Kim Chen Yn óz sarbazdaryn Resei tutqynyndaǵy jaýyngerlerimizge almastyrýdy uiymdastyra alsa, Ýkraina onyń sarbazdaryn berýge daiyn" dedi Zelenskii X platformasynda.
Ol eki sarbazdyń tergeý suraqtaryna jaýap bergen videosyn jariialady. Biriniń qoly, biriniń jaǵy tańylǵan. Qoly tańylǵany tósekte jatyp jaýap bergen.
Aýdarmashy arqyly sóilesken eki sarbazdyń biri Ýkrainaǵa qarsy soǵysyp jatqanyn bilmegenin aitady. Óziniń aitýynsha, shabýyl kezinde tyǵylyp qalyp, eki kúnnen keiin tabylǵan. Bul sarbaz Soltústik Koreiaǵa oralý týraly buiryq tússe oryndaitynyn, biraq múmkindik bolsa Ýkrainada qalýǵa daiyn ekenin bildirgen.
Bul videonyń táýelsiz kózder arqyly rastaý múmkin bolmady.
"Biri Ýkrainada qalýǵa, biri Koreiaǵa qaitýǵa niet bildirdi" dedi Zelenskii teleúndeýinde.
Zelenskii eline oralǵysy kelmeitin soltústikkoreialyq sarbazdarǵa basqa joldar usynylatynyn, "bul soǵystyń shyndyǵyn korei [tilinde] taratý arqyly beibitshilikke jol bastaýǵa nietti adamdarǵa múmkindik berilýi qajetin" málimdedi. Biraq munyń egjei-tegjeiin baiandamady.
.jpg)
