Ýkraina prezidenti Vladimir Zelenskii Grýziianyń burynǵy prezidenti Mihail Saakashvilige Ýkraina premer-ministriniń reformalar jónindegi orynbasary bolýdy usyndy. Bul týraly Saakashvili 22 sáýirde Facebook paraqshasynda habarlady.
Saakashvili bul máseleni Ýkraina premer-ministri Denis Shmygalmen talqylap qoiǵanyn da aitty. Grýziianyń burynǵy prezidenti bul usynysty "úlken abyroi" dep ataǵan. Sailaý kezinde Vladimir Zelenskiidi qoldaǵanyn eske túsirip, onyń komandasyn maqtaǵan.
Saakashvilige usynys týraly aqparatty birinshi bolyp prezidenttik "Slýga naroda" partiiasyndaǵy aqparat kózine silteme jasaǵan "Novoe vremia" saity habarlaǵan. "Slýga naroda" fraktsiiasy jetekshisiniń orynbasary Evgeniia Kravchýk basylymǵa Saakashvilidiń depýtattarmen kezdesip, osy jumada (24 sáýir) baǵdarlamasyn tanystyratynyn aitqan.
2015 jyly Saakashvili Ýkraina azamattyǵyn alyp, sol kezdegi prezident Petr Poroshenkonyń jarlyǵymen Odessa oblysynyń basshylyǵyna taǵaiyndalǵan bolatyn. Osydan keiin Grýziia «qos azamattyqqa jol berilmeidi» degen ýájben Saakashvilidi Grýziia azamattyǵynan aiyrdy.
Poroshenko pen Saakashvili qatynasy 2016 jyly jemqorlyqpen kúres jáne reforma jasaý týraly bastamalardan keiin buzylyp, qarasha aiynda Saakashvili qyzmetinen bosatyldy. 2017 jyly shilde aiynda Saakashvili «Jańa kúshter rýhy» (ýkrain tilinde: Rýh novih sil – red.) dep atalatyn oppozitsiialyq partiia qurǵan soń Poroshenkonyń jarlyǵymen Ýkraina azamattyǵynan aiyrylǵan.
Byltyr mamyr aiynda Ýkrainanyń jańa prezidenti Vladimir Zelenskii Saakashvilige Ýkraina azamattyǵyn qaitaryp bergen edi.
Saakashvilidiń kandidatýrasyn Joǵarǵy rada maquldaýy tiis. 24 sáýirde plenarlyq otyrys kezinde osy másele talqylanady dep aitylady.
