Ýkraina prezidenti Vladimir Zelenskii búgin, 14 qarashada Hersonǵa bardy. Bul týraly Reuters habarlady.
Zelenskii Ýkraina jaýyngerleri aldynda sóz sóiledi. Olarǵa alǵys aityp "Biz beibit ómir súrýge daiynbyz" dedi.
Ýkraina prezidenti NATO men ózge de odaqtastaryna Ýkrainaǵa qoldaý kórsetkeni úshin alǵys bildire kele, AQSh bergen HIMARS reaktivti artilleriialyq júiesi soǵysta mańyzdy ról atqarǵanyn atap ótti.
Reuters habaryna qaraǵanda, qala turǵyndary Zelenskiidi Hersonnyń bas alańynda Ýkraina týymen qarsy alǵan. Turǵyndardyń keibiri balalarymen kelgen.
"Shyn máninde baqyttymyn. Adamdardyń qýanyshy kózderinen kórinip tur" - deidi Zelenskii.
"Ýkraina qarýly kúshteri ári qarai qaida shabýyl jasaidy?" degen jýrnalist suraǵyna ol "Máskeýge emes… Bizge ózge eldiń jeri kerek emes" dep jaýap bergen.
Aita keteiik, Vladimir Zelenskii Ońtústik Herson aimaǵynda jumys istep jatqan tergeýshiler "Resei áskeri jasaǵan 400-den asa áskeri qylmysty ashqanyn" málimdegen edi.
Sondai-aq, ótken jumada Resei qorǵanys ministrligi Ýkrainanyń Herson oblysyndaǵy qarýly kúshteri 11 qarashada Dnepr ózeniniń sol jaǵalaýyna ótkenin aitqan. Ýkraina áskeri sol kúni Hersonǵa kirgen.
