Ýkraina prezidenti Vladimir Zelenskii Reseidi "Ýkrainada genotsid jasady" dep aiyptady. Batys liderleri Kiev túbindegi Býcha qalasynan Resei soldattary ketkennen keiin tabylǵan kóshede shashylyp jatqan deneler týraly jantúrshigerlik málimetterdi alyp, Reseidi kinálap jatyr, dep habarlaidy Azattyq radiosy.
Zelenskiidiń CBS telernasynyń efirindegi "Bul shyn máninde genotsid, bir ultty, halyqty tutastai joiý" degen sózin "Amerika daýysy" da taratty.
Zelenskii Resei qarýly kúshterin qatań aiyptap, Kreml basshylary óz áskeriniń Býchadaǵy jaýyzdyǵyn ózderi kelip kórsin degen edi.
"Resei Federatsiiasynyń basshylyǵy óz buiryqtary qalai oryndalyp jatqanyn kórse eken. Buiryǵy qandai bolsa, oryndalýy da solai. Osy qyrǵyn úshin, osy azaptaǵandary úshin, jarylystan qol-aiaǵy bólinip, kóshede shashylyp qalǵan adamdar úshin olardyń jaýapkershiligi de ortaq",- dedi Zelenskii jeksenbi kúni orys tilinde jasaǵan video úndeýinde. Ol Resei prezidenti Vladimir Pýtin men Resei áskeri qyzmetkerleri Ýkrainadaǵy áreketteri úshin jaýap berýge tiis dep málimdedi.
AQSh Memlekettik hatshysy Entoni Blinken de Býchadaǵy beibit adamdardyń qyrǵynyna kináliler jaýap bersin degen málimdeme jasady.
AQSh-tyń Ýkrainadaǵy elshiligi twitter-akkaýntyna: "Pýtin áskerinen qalǵan Býcha men ózge de aýdandardaǵy kórinister sumdyq. AQSh úkimeti qolda bar quraldaryn túgel paidalanyp, kinálilerdi anyqtaýǵa tyrysady. Biz únsiz qala almaimyz, ne bolyp jatqanyn álem bilýge tiis, bárimiz áreket etýimiz qajet" dep jazdy.
NATO Bas hatshysy Iens Stoltenberg te Býcha qyrǵynyn keiingi onjyldyqtarda Eýropada bolmaǵan "jaýyzdyq" dep atady.
