Mariýpoldegi "Azovstal" zaýytynda qorshaýda qalǵan Ýkraina jaýyngerlerin evakýatsiialap jatyr. Bul jóninde Reuters agenttigi habarlap, birneshe fotosýret jariialady. Aqparatty Ýkraina qarýly kúshteriniń bas shtaby rastady.
"Azovstalden" barlyǵy 264 adam shyqqan, onyń 53-i jaraly jaýynger" deidi Bas shtab. Reuters málimetine qaraǵanda, olardy Novoazovsk qalasyna jetkizgen. Bul qala Resei qoldaityn separatister baqylaýynda tur. Jaraly jaýyngerlerdiń Novoazovskige aparylatynyn buǵan deiin Resei qorǵanys ministrligi de habarlaǵan bolatyn.
Qalǵan 211 jaýyngerdi gýmanitarlyq dáliz arqyly separatistik "DHR" baqylaýyndaǵy Elenovkaǵa alyp ketken.
Ýkraina jaýyngerleri tutqynǵa alyndy ma, joq pa degen másele aitylmady. Ýkraina qorǵanys ministriniń orynbasary Anna Maliardyń sózinshe, "olardy Resei tutqyndaryna aiyrbastaýy múmkin".
Ýkraina prezidenti Vladimir Zelenskii Mariýpoldegi evakýatsiia týraly: "Ýkraina áskeri qyzmetkerleriniń – Ýkraina qarýly kúshteri men barlaýynyń, kelissóz tobynyń, Halyqaralyq Qyzyl krest komiteti men BUU-nyń arqasynda júzege asty. Jaýyngerlerimizdiń ómirin saqtap qalýdyń sáti túsedi dep úmittenemiz. Bizge Ýkraina batyrlarynyń tiri bolǵany kerek. Bul - bizdiń printsipimiz. Menińshe, muny aqyl-esi túzý árbir adam túsinedi", - dedi.
Dúisenbi kúni Ýkrainanyń "Azov" polkiniń komandiri Denis Prokopenko "Mariýpol garnizony joǵary áskeri basshylyq bekitken sheshimdi oryndaitynyn jáne Ýkraina halqy qoldaidy dep úmittenetinin" videoúndeýmen jariialaǵan.
Buǵan deiin Resei qorǵanys ministrligi Mariýpoldegi "Azovstal" qorshaýynda qalǵan Ýkrainanyń jaraly jaýyngerlerin evakýatsiialaý jóninde Ýkrainamen kelisimge kelgenin málimdegen edi. Mundai kelisim bolǵanyn separatist komandirlerdiń biri Aleksandr Hodakovskii de habarlaǵan.
- Mariýpol qalasy Resei áskeriniń baqylaýyna ótkenimen "Azovstal" zaýytyn áli kúnge Ýkraina jaýyngerleri bermei otyrǵan. Ýkraina basshylyǵy sekildi olar da "Azovstalden" tym bolmaǵanda jaraly jaýyngerlerdi evakýatsiialaýǵa múmkindik berýge shaqyrǵan. Resei olar berilip, tutqynǵa túsýge tiis degen talap qoiǵan.
