Balqashta kottedji men avtokóligi bar zeinetker óz qyzynan sot arqyly aliment óndirip alýǵa tyrysqanymen, onyń talaby qanaǵattandyrylmady. Sot er adamnyń zań boiynsha muqtaj sanatqa jatpaitynyn jáne ózin-ózi qamtamasyz etýge jetkilikti qarajaty bar ekenin anyqtady, dep habarlaidy ult.kz.
Joǵarǵy sottyń baspasóz qyzmetiniń málimetine sáikes, Balqash turǵyny qyzynan ai saiyn 10 AEK (43 250 teńge) kóleminde aliment óndirýdi suraǵan. Ol ótinishinde kúnkóris pen dári-dármek shyǵyndaryna bailanysty qosymsha kómekke muqtaj ekenin kórsetken.
«Neke (erli-zaiyptylyq) jáne otbasy týraly» kodekske sáikes, kámeletke tolǵan balalar eńbekke jaramsyz ári muqtaj ata-analaryn asyraýǵa mindetti.
Alaida sot barysynda talap qoiýshynyń 128 229 teńge zeinetaqy alatyny, sondai-aq eki qabatty úii men Mitsubishi Montero Sport avtokóligi bar ekeni anyqtaldy.
Qyzy talapty moiyndamai, eki balany jalǵyz tárbielep otyrǵanyn jáne 85 myń teńge jalaqy alatynyn aitqan. Onyń sózinshe, ákesi kottedjde jalǵyz turady, turaqty zeinetaqysy men múlki bar, sondyqtan qosymsha kómekke muqtaj emes.
Sot er adamnyń emdelýge turaqty shyǵyndary nemese ómirlik qajettilikterin qamtamasyz ete almaityny týraly naqty dálel usynbaǵanyn atap ótti. Sonymen qatar, oǵan uly tarapynan da materialdyq qoldaý kórsetiletini belgili boldy.
Nátijesinde sot talapty qanaǵattandyrýdan bas tartyp, aliment óndirýge negiz joq degen sheshim shyǵardy. Sheshim zańdy kúshine endi.
