Qazaqstanda zeinetaqy jinaqtarynyń eń tómengi jetkiliktilik shegi (TJSh) aitarlyqtai ósti. Biryńǵai jinaqtaýshy zeinetaqy qory (BJZQ) 2026 jylǵa arnalǵan jańa kórsetkishterdi jariialap, endi azamattardyń turǵyn úi nemese emdelý maqsatynda paidalana alatyn qarajaty azaiýy múmkin ekenin málimdedi, dep habarlaidy ult.kz.
Jańa ádisteme boiynsha 20 jastaǵy azamat úshin jetkiliktilik shegi 6,67 mln teńge bolsa, 30 jasta – 9,75 mln teńge, 40 jasta – 13,37 mln teńge, al 60 jastaǵy azamat úshin 22,5 mln teńgege deiin jetedi.
BJZQ málimetinshe, TJSh mólsheri endi bolashaqtaǵy nysanaly zeinetaqy tólemderiniń kólemine qarai esepteledi. Esepteý kezinde demografiialyq kórsetkishter, investitsiialyq kiristilik pen tólemderdi indeksteý faktorlary eskeriledi. Sonymen qatar formýlaǵa azamattyń bolashaqta aýdaratyn zeinetaqy jarnalary engizilmeidi.
Qordyń túsindirýinshe, bul tásil jinaqtyń bir bóligin merziminen buryn paidalanǵan azamattardyń qartaiǵanda tómen zeinetaqy alý qaýpin azaitýǵa baǵyttalǵan.
Soǵan qaramastan, turǵyn úi jaǵdaiyn jaqsartý jáne emdelý úshin jinaqtyń bir bóligin paidalaný quqyǵy saqtalady. Zeinetaqysy burynǵy tabysynyń keminde 40 paiyzyn quraityn azamattar jinaqtarynyń 50 paiyzyna deiin paidalana alady. Al zeinetaqy annýitetin rásimdegender men eńbek sińirgen jyldary úshin memlekettik tólem alatyn azamattar shottaǵy qalǵan qarajatty tolyq kólemde qoldana alady.
BJZQ dereginshe, jańa ádisteme engizilgennen keiin TJSh mólsheri jas ereksheligine qarai keminde 79 paiyzǵa artqan. Zeinetkerlik jasqa jaqyndaǵan saiyn shotta saqtalýy tiis qarajat kólemi de ulǵaiady. Keibir sanattar úshin bul kórsetkish burynǵydan eki eseden astam joǵarylaǵan.
Qor mamandarynyń aitýynsha, ózgeristerdiń basty maqsaty – azamattardyń bolashaqta turaqty ári jetkilikti zeinetaqy alýyn qamtamasyz etý. Jańa esepteý tásili boiynsha jinaqtaýshy zeinetaqy tólemderi medianalyq jalaqynyń shamamen 40 paiyzyna deiin jetýi múmkin. Buryn bul kórsetkish nebári 15 paiyz shamasynda bolǵan.
