Tanymal ánshi Jazira Baiyrbekovanyń sińlisi Nazira Baiyrbekova áleýmettik jelidegi paraqshasynda er adamnyń opasyzdyǵy men neke adaldyǵy týraly pikirin bólisti, dep habarlaidy ult.kz.
Onyń aitýynsha, ózin qurmetteitin jáne jeke shekarasyn biletin áiel kúieýiniń kózine shóp salýyn keshirmeýi múmkin. Nazira Baiyrbekova úshin otbasy men adaldyq – áieldiń baqytyndaǵy mańyzdy qundylyqtardyń biri.
«Óz qunyn biletin, ózin-ózi baǵalaityn, shekarasy anyq, otbasyn, neke adaldyǵyn qundy dúnie, baqytymnyń ózegi dep qaraityn áielder “izmenany” keshirmeidi», – dep jazdy ol.
Nazira Baiyrbekova mundai jaǵdaida er adamnyń jasy, ómirlik jaǵdaiy nemese ózge de sebepter áieldiń sheshimin ózgertýge tiis emes dep sanaidy.
«Erteń óletin bolyp tursa da, al búgin syńary kózine shóp salsa, búgin ajyrasady. Ómiriniń sońǵy kúni bolsa da», – dedi ol.
Sondai-aq ol áiel adam ózine degen qurmetsizdikke kóz juma qaramaýy kerek ekenin atap ótti.
«Qosh bol, kóńildes izdeýden basqa ómirden mán taba almaǵan adam!» – dep jazdy Nazira Baiyrbekova.
Aita keteiik, Nazira Baiyrbekova otandyq ánshi Jazira Baiyrbekovanyń sińlisi.
Jazira Baiyrbekova kim?
Jazira Baiyrbekova – qazaq estradasynda ózindik orny bar ánshi. Ol jubaiy Janbolat Erbatyrovpen birge dýet bolyp óner kórsetip, kópshilikke keńinen tanylǵan. Ánshiniń repertýarynda elýden astam shyǵarma men jiyrmaǵa jýyq beinebaian bar.
Jazira Baiyrbekova 1978 jyly 30 qyrkúiekte qazirgi Túrkistan oblysy aýmaǵynda dúniege kelgen. Ol ónerge bala kezinen jaqyn bolyp, mektep qabyrǵasynda dombyra tartyp, án aitqan. Aýdandyq jáne oblystyq baiqaýlarǵa qatysyp, mekteptiń dombyra orkestrinde óner kórsetken.
Ánshi kópshilik aldyna alǵash 1992 jyly shyqqan. Sol jyly Almatydaǵy «Tamasha» oiyn-saýyq otaýyna shaqyrylyp, halyq áni «Sáýlem-ai» ánin oryndaǵan. Osydan keiin onyń shyǵarmashylyq joly kásibi sahnamen bailanysa bastaidy.
Arys qalasyndaǵy mektepti támamdaǵan soń Jazira Baiyrbekova Almatydaǵy Júsipbek Elebekov atyndaǵy estrada-tsirk ýchilishesinde bilim alǵan. Keiin Qazaq memlekettik qyzdar pedagogikalyq ýniversitetin támamdaǵan.
Jazira Baiyrbekovanyń shyǵarmashylyq jolyndaǵy mańyzdy kezeńderdiń biri – jubaiy Janbolat Erbatyrovpen birge dýet qurýy. Olar 2002 jyldan bastap birge sahnaǵa shyǵyp, qazaq estradasynda erli-zaiypty ánshiler dýeti retinde tanyldy.
Ánshiniń tanymal shyǵarmalarynyń qatarynda «Sen maǵan súiýdi úirettiń», «Qyz baqyty», «Qyz uzatý», «Besik jyry», «Balapanym baldai» siiaqty ánder bar. Jazira Baiyrbekova repertýaryndaǵy ánderdi óz daýys ereksheligine qarai óńdep oryndaitynyn da suhbattarynda aitqan.
Ónerli otbasynda dúniege kelgen Jazira Baiyrbekovanyń baýyrlary arasynda da shyǵarmashylyq joldy tańdaǵandar bar. Onyń ápkesi Lázzat Baiyrbekova ánshi retinde tanylsa, aǵasy Erbol Baiyrbekov – kompozitor. Sińlisi Nazira Baiyrbekova da buqaralyq aqparat quraldarynda jáne áleýmettik jelide belsendi.
Jazira men Janbolat shyǵarmashylyqpen qatar jas ónerpazdarǵa da qoldaý kórsetip keledi. Olar ár jyldary jas oryndaýshylardan quralǵan toptarmen jumys istep, shákirt tárbieleýge kóńil bólgen.
Jazira Baiyrbekova otbasylyq taqyryptardy da jii qozǵaidy. Buǵan deiingi suhbattarynyń birinde ol otbasy baqyty úshin erli-zaiyptylar arasyndaǵy sabyr, syilastyq, mahabbat pen janashyrlyqtyń mańyzdy ekenin aitqan.
Aita keteiik, naýryz aiynda ánshiler Janbolat pen Jazira Dýbaida qalyp qoiǵanyn málimdegen edi.
