Baspanasy bar adamdy baspanasyzǵa ainaldyrý - qylmys. Mundai pikirdi «Qazaqstandaǵy parlamentarizmdi damytý qory» qoǵamdyq qorynyń prezidenti Záýresh Battalova bildirdi, dep habarlaidy QazAqparat.
«Búginde elimizde kóptegen azamattyń baspanasyz júrgenin kórip otyrmyz. Koronavirýs indeti kezinde jaǵdai odan ary múshkil bola tústi. Jalǵyz ǵana baspanasy bar adamdardy páterinen qalai aiyrmaqpyz? Qazirgi ýaqytta Qazaqstanda baspanasyzdyq artyp barady. Biznes nysandar salamyz dep jerin tartyp alǵan kezde azamattar baspanasynan aiyrylady. Ne bolmasa bank kreditin tólei almai páterinen aiyrylyp qalady. Úleskerlik qurylysqa qatysamyn dep baspanasyz qalǵandar da bar. Paidalýǵa berilgen úiine kirip, artynan odan aiyrylyp qalǵan adamdar da kezdesedi. Bul - aqylǵa syimaityn dúnie. Baspanasy bar adamdy baspanasyzǵa ainaldyrý - qylmys dep sanaimyn. Sondyqtan Qazaqstandaǵy parlamentarizmdi damytý qory turǵyn úi máselesine arnalǵan zańǵa ózgeris engizýdi talap etip otyr. Sol ózgeristerdiń birinde adamdardyń baspanasy bostan bosqa alynbaýy tiistigi kózdelgen», - dedi Záýresh Battalova.
Onyń aitýynsha, halyqaralyq standartqa sáikes, balama páter bermeiinshe nemese naryqtyq qunyn ótemeiinshe azamatty baspanasynan májbúrlep shyǵarýǵa bolmaidy.
«Bul zań jobasyn ótken jyly bastap, osy jyldyń maýsymynda aiaqtaǵan edik. Biraq, koronavirýs indeti ýaqytty uzartyp jiberdi. Degenmen, 1 qyrkúiekte Prezident óz Joldaýynda turǵyn úi máseleleri jónindegi zańnamaǵa ózgerister engizýge tapsyrma berdi. Sondyqtan biz osydan eki kún buryn Aqparat jáne qoǵamdyq damý ministrligine qarasty komitetpen kezdesken edik. Olar búginde osy turǵyn úi máselesi jónindegi zańdarǵa ózgerister daiyndaýǵa kiristi. Biz olarmen kelistik, usynystarymyzdy jiberemiz. Dál «bizdiń zańymyz ótsin« demeimiz. Biz ázirlegen zańdaǵy normalar basqa zańdarǵa engizilse de qanaǵattanamyz», - dedi ol.
Al Qazaqstan kommýnistik halyq partiiasy Ortalyq komitetiniń hatshysy Jambyl Ahmetbekov zań jobasyn Parlament qaraýyna engizý protsedýrasynyń uzaqqa sozylýy múmkin ekendigin aitady.
«Zań jobasy eń aldymen saraptamaǵa jiberiledi. Oǵan qarajat qajet bolady. Qarajat Úkimet tarapynan bólinýi kerek. Odan keiin oń sheshim qabyldanyp jatsa, zań jobasy Úkimet tarapynan qaralyp, qorytyndysy shyǵyp, Parlamentke túsedi. Bul uzaq ýaqytta talap etetin jumys», - dedi ol.
