Foto: ashyq derekkóz
Qazaqstan Respýblikasynyń Bas prokýratýrasy men Ishki ister ministrliginiń Interpol qyzmetkerleri, Syrtqy ister ministrliginiń qoldaýymen Túrkiiadan Qazaqstan azamatyn elge qaitardy, dep habarlaidy Ult.kz.
Ol – quqyq qorǵaý organynyń burynǵy qyzmetkeri, transulttyq uiymdasqan qylmystyq topqa qatysqany jáne zańsyz oiyn biznesin uiymdastyrǵany úshin kúdiktelýde.
Tergeý derekterine sáikes, kúdikti 2015–2016 jyldary Shyǵys Qazaqstan oblysyndaǵy memlekettik organda basshylyq qyzmet atqaryp júrgende oiyn biznesine qamqorlyq jasap, júieli túrde para alǵan. Qylmys áshkerelengennen keiin ol jasyrynǵan jáne 7 jyl boiy halyqaralyq izdeýde boldy.
2024 jyldyń qańtarynda kúdikti Túrkiianyń Izmir qalasynda ustalyp, Qazaqstannyń suraýy boiynsha ekstraditsiialandy. Qazir ol tergeý izoliatorynda qamaýda otyr.
Buǵan deiin qylmystyq toptyń basqa músheleri túrli merzimge bas bostandyǵynan aiyrylǵan. Al bul kúdiktige qatysty aiyp dáleldense, Qylmystyq kodeks boiynsha onyń múlki tárkilenip, 12 jyldan 20 jylǵa deiin bas bostandyǵynan aiyrylýy múmkin.
Bas prokýratýra shetelde jasyrynyp júrgen sybailas jemqorlyq pen ekonomikalyq qylmys jasaǵandardy anyqtaý jáne jaýapqa tartý jumystaryn jalǵastyryp jatyr.
