Qazaqstanda 35 adamdy marketpleis arqyly mol paida tabýǵa ýáde berip aldaǵany úshin sottalǵan Altynai Didarqyzynyń isine qatysty ony jarnamalaǵan blogerlerdiń áreketi de tekserilýi múmkin. Bul týraly Kozachkov offside Telegram arnasynda aityldy, dep habarlaidy ult.kz.
Altynai Didarqyzy 2023 jyly ózin «Wildberries hanshaiymy» dep tanystyryp, marketpleisterde saýda jasaýdy úiretetin kýrstaryn jarnamalai bastaǵan. Ol áleýmettik jelilerdegi tanymal infliýenserler arqyly óz biznesin nasihattap, qymbat kólikterin, elitalyq turǵyn úi keshenindegi páterdi jáne ata-anasyna úi salyp jatqanyn kórsetken.
Osylaisha, onyń jobasyna qyzyǵýshylyq tanytqandar kóbeigen. Didarqyzy seriktesterine taýarǵa 10 million teńge salyp, ony satqannan keiin taǵy 5 million teńge paida tabýǵa bolatynyn ýáde etken.
Jábirlenýshilerdiń biri jobaǵa 500 myń teńge salsa, endi biri 50 million teńgege deiin qarajat quiǵan. Al bir adam oǵan 100 million teńge senip tapsyrǵan.
Keiin kásipker klientterden qosymsha aqsha talap ete bastaǵan. Birde AQSh-taǵy tasymaldaý kompaniiasynyń qyzmetine, endi birde salyq aiyppulyna nemese buǵattalǵan esepshotty ashýǵa qarajat suraǵan. Alaida salymshylar naqty saýda men paida kórmegen soń, politsiiaǵa júgingen.
Altynai Didarqyzy tergeý kezinde de, sotta da kinásin moiyndamaǵan. Soǵan qaramastan, sot ony 6 jyl 8 aiǵa bas bostandyǵynan aiyrdy. Biraq kishkentai balasy bolǵandyqtan, jazany óteý bir jylǵa keiinge qaldyrylǵan.
Sýdia Baqtiiar Noǵaev isti qaraý barysynda Didarqyzynyń jobasyn jarnamalaǵan blogerlerge qatysty da jeke qaýly shyǵarǵan. Sottyń pikirinshe, Ishki ister ministrligi infliýenserlerdiń áleýmettik jelilerde onyń biznesi týraly jalǵan aqparat taratýǵa yqpal etken-etpegenine quqyqtyq baǵa berýi kerek.
Qaýlyda, atap aitqanda, Instagram jelisinde 2,9 million oqyrmany bar Janiia Djýrinskaia men 1,4 million oqyrmany bar Ásel Asqardyń áreketteri atalǵan.
Altynai Didarqyzyna qatysty úkim zańdy kúshine engen. Blogerlerdiń áreketine qatysty qandai sheshim qabyldanatyny ázirge belgisiz.
