Zańger Orynbasar Tilepbergenovtyń aitýynsha, jábirlenýshi Baqyt Nazarova kelisimge kelgenin aityp, sotqa qaita talap-aryz bergen jaǵdaida 6 jylǵa sottalǵan ánshi Gaýhar Álimbekova bostandyqqa shyǵýy múmkin.
Al Gaýhar Álimbekovany sotqa bergen Baqyt Nazarova 20 jyldan beri bazarda saýda jasap júr.
Qarapaiym azamatsha kezinde Gaýharǵa 40 myń dollar taýyp berý úshin birneshe ret nesie alyp, qaryzǵa belshesinen batqan. Onyń sotqa bergendegi maqsaty – ánshini túrmege otyrǵyzý emes, aqshasyn qaitarý eken. Óziniń esepteýi boiynsha, Álimbekova oǵan 51 myń dollar, 10 million 500 myń teńge qaryz, dep habarlaidy 31 arna.
"Osyndai ortamyzda jaǵdai boldy eken dep men ony tabalamaimyn. Oǵan degen ókpem de, kegim de joq. Al ony men keshiremin, keshirmeimin deitindei men kimmin Alla turǵanda? Alla bárimizdiń keshirim, táýbámizdi qabyl alatyn. Sizderge aitarym, Gaýhardy túsinýge, sókpeýge tyrysyńyzdar", – deidi jábirlenýshi.
Halyq sot Gaýharǵa tym aýyr jaza berdi dep áleýmettik jelide jarysa jazyp jatyr. Alaida zańger Orynbasar Tilepbergenov ánshi tipti, 10 jylǵa deiin bas bostandyǵynan aiyrylýy múmkin edi dep otyr. Sot onyń buryn sottalmaǵany men qoǵamdaǵy bedelin eskergen. Zańgerdiń aitýyna qaraǵanda, Gaýhar men ony sotqa bergen áiel bitimge kelgende is osylai aiaqtalmas edi.
"Appeliatsiiaǵa bergen kúnniń ózinde Álimbekovanyń quqyqtyq jaǵdaiy ózgermeidi. Óitkeni sottan biz óreskel qatelik kórip turǵan joqpyz. Al jábirlenýshi "kelisimge keldim" dep, qaita talap aryz beretin bolsa, onda jaǵdai ózgerip, Álimbekovanyń bosap shyǵýǵa múmkindigi bar", – deidi zańger.
Demek, Nazarova men Álimbekova ymyraǵa kelse, ánshiniń bostandyqqa shyǵýy ábden múmkin.
Aita ketsek, keshe elimizdegi tanymal ánshilerdiń biri Gaýhar Álimbekova alaiaqtyq jasaǵany úshin 6 jylǵa sottaldy degen aqparat kópshilikti eseńgiretip tastady.
Gaýhar Álimbekova týraly ne bilemiz?
Ánshi Túrkistan oblysy Jetisai aýdanynda qarapaiym otbasynda dúniege kelgen. Basqa ánshiler sekildi óziniń ómirin jariialaýdy asa unatpaityn ol 2017 jyly 45 jasynda alǵash ret turmysqa shyqqan. Dál osy jyly qurbysy Baqyt Nazarova Gaýhar Álimbekovanyń ústinen aryz jazǵan. Ánshiniń tańdaǵan ómirlik jarynyń esimi áli belgisiz. Erli-zaiyptylar dúrkiretip toi jasamai, qarapaiym neke qidyrý saltanatyn jón kórgen.
Otandyq shoý-bizneste Gaýhar Álimbekova "Ákege saǵynysh", "Jazyǵym ne?", "Aq kelin" syndy ánderimen tanymal. Sonymen qatar ánshi jas kezinen bastap gitarmen án salady. Gaýhar Álimbekova ánderiniń sózi men mýzykasyn ózi jazatyn kompozitor.
Gaýhar Álimbekovanyń anasy qyzynyń tárbiesine qatal qaraidy. Tipti óner jolyna túsip, ánshi bolýyna qarsylyq tanytqan. Bolashaq ánshi Qyzdar pedagogikalyq institýtyna oqýǵa túsip, ekinshi kýrsynda oqýdan shyǵyp qalǵan.
Sot úkimi
Sot úkimi shyqqannan keiin ánshiniń advokaty Jumaǵali Zinelov istiń mán-jaiyn aityp bergen edi. Advokat sot úkimimen kelispeitinin aityp, apelliatsiialyq sotqa aryz beretinin jetkizdi. Onyń sózinshe, bul iste úkim óte jyldam ári mán-jaiyn anyqtamai jatyp shyǵarylǵan.
"Men aiyptaý aktisi qate shyǵarylǵan dep esepteimin. Gaýhar Álimbekovanyń bul iste kinási, paida kórgeni, aram piǵyly bolǵany birde-bir epizodta dáleldenbegen dep esepteimin", — dedi Zinelov.
30 qańtarda ótken otyrysta sot aldynda eki áiel – 2016 jyly 6 jyl 8 aiǵa bas bostandyǵynan aiyrylǵan Ferýza Ordabaeva men tanymal qazaqstandyq ánshi Gaýhar Álimbekova jaýap berdi.
Sot barysynda anyqtalǵandai, aiyptalýshylar tanysyna iri turǵyn úi kesheninen páter satyp alyp berýdi ýáde etken, alaida ýádesin oryndamai, aqshany qaitarmai qoiǵan.
Almaty qalasy Almaly aýdandyq sotynyń sheshimimen Ferýza Ordabaeva 190-baptyń 4-bóligi 2-tarmaǵy boiynsha kináli dep tanylyp, 6 jyl 8 aiǵa bas bostandyǵynan aiyrý jazasyna kesildi. Ol buǵan deiin de sottalyp, jazasynyń bir bóligin áli ótemegen bolyp shyqty. Táýelsizdiktiń jiyrma bes jyldyǵyna bailanysty jariialanǵan raqymshylyq kezinde onyń jaza merzimi 3 jyl 6 aiǵa deiin qysqartylǵan. Nátijesinde Ordabaeva 7 jylǵa sottaldy.
Gaýhar Álimbekova Qylmystyq kodekstiń 190-baby 4-bóliginde qarastyrylǵan qylmysty jasady dep tanylyp, 6 jylǵa bas bostandyǵynan aiyryldy.
Sottalýshy jazasyn orta qaýipsizdiktegi mekemede óteidi. Qazirgi ýaqytta úkim áli kúshine engen joq.
Gaýhar Álimbekovanyń Elbasyna jazǵan haty
Áleýmettik jelide Gaýhar Álimbekovanyń úndeý haty taralyp jatyr. Hat Elbasy Nursultan Nazarbaevqa arnalyp jazylǵan. Mátinde ánshi sońǵy eki jylda shyǵarmashylyqtan kóz jazyp, alaiaqtardyń qurbany bolǵanyn jazǵan. Eki jyldan soń úisiz dalada qalǵan ánshi eseńgirep, tiisti organdarǵa aryz jazýǵa da jaǵdaiy bolmaǵanyn aitady.
"…Meniń aty-jónim Gaýhar Álimbekova, ánshi-kompozitormyn. Ónerde júrgen otyz jyl ishinde 60-qa jýyq ándi ómirge ákelippin. Sonyń ishinde "Aq kelin" ánin ózińiz de estigen bolarsyz… Alaida sońǵy eki jylda shyǵarmashylyqtan múlde kóz jazyp qaldym. Áldebir alaiaqtardyń arbaýyna túsip, aiybym joq bolsa da, isti bolyp, sottalyp ketýdiń az-aq aldynda turmyn. Meni sizge hat jazýǵa itermelegen de osy másele. Ordabaeva Ferýza atty azamatshany 2009 jyldan beri tanityn edim… Sol F.Ordabaeva 2013 jyly Almaty qalasy ákimdiginde tanystary baryn aityp, solardyń kómegi arqyly "Qoljetimdi baspana" memlekettik baǵdarlamasy boiynsha satý-satyp alý kelisimshartymen "Aqkent" turǵyn úi kesheninen páter alýǵa múmkindik baryn aitty.
…Sóitip, men, Gaýhar Serikbaiqyzy Álimbekova, aǵam Áýezhan Serikbaiuly Álimbekov ózi jáne uly Álidiń atynan qajetti qujattar men qarajatymyzdy (80 myń AQSh dollary) Ordabaevaǵa tabystadyq. Qamkóńil qazaqpyz ǵoi, ózimniń uzaq jyldan beri ápkeli-sińlidei aralasyp júrgen Baqyt Nazarova esimdi ápkeme de páter alýdyń osyndai múmkindigi baryn aittym. Maqsatym — bir qazaqtyń baspana máselesi sheshilsin degen adal niet qana edi. Ol da óz kezeginde ulynyń atynan "Aqkent" qalashyǵynan úi alyp, álgi páterin jalǵa berip qoidy.
Biraq qýanyshymyz kópke sozylmady. Arada eki jyl ótken soń páter ápergen F.Ordabaevanyń bárimizdi aldap soqqany, iaǵni páterlerdi zańsyz jolmen bergeni belgili boldy. Sońynda "Aqkenttegi" páterimizden bárimizdi qýyp shyqty. Ashyǵyn aitqanda, sómkemizdi arqalap, dalada qaldyq…" dep jazylǵan hatta.
Hat sońynda ánshi eshaqndai zańsyz áreketke barmaǵanyn aityp, Elbasynan oqiǵanyń aq-qarasyn ashyp, arasha túsýin suraǵan.
Ánshiler qoldaý kórsetti
Otandyq ánshiler men tilshiler qaýymy Gaýhar Álimbekovany qoldap, qaryz bolyp qalǵan sommany jinap berýge daiyn ekenin jazyp jatyr. Olardyń qatarynda Sáken Maiǵaziev, Ainur Tursynbaeva, Aigúl Imanbaeva, Láilá Sultanqyzy, Meirambek Besbaev, Roza Álqoja, Nurlan Alban, Gúlzira Aidarbekova, t.b bar.
Aitysker aqyn ainur Tursynbaeva Instagram paraqshasynda zańnyń barlyǵyna birdei ekenin aityp, qazaq ónerindegi qasiretti kún dep baǵalady.
"…Byltyr Tuńǵyshbai, biyl Gaýxar.. Kelesi kim?! Qurbysyn da kinalaǵym kelmeidi-aq… Biraq Alla razylyǵy úshin keshirip jibergenińizde Allanyń sheksiz nyǵmetine bólener edińiz ǵoi, qap.. Ne boldy endi?! Bálkim bir qorqytyp ta qoiǵyńyz kelgen shyǵar.. Gaýxardyń ózi de bulai bop ketedi dep oilamaǵan aý… Zań bárimizge birdei.. Biraq eldiń erkelerine degen qurmet qaida?! Qazaq án ónerine sizdei úles qosqan qyzdar az!", - dep jazdy Ainur Tursynbaeva.
Ánshi Roza Álqoja Raýhar Álimbekovanyń qazaq án ónerine qosqan úlesin sanamalai kele, bir múmkindik berilýi kerek emes pe degen saýal qoidy.
"Gaýhar Álimbekova eshqashan ataqqa, aqshaǵa qunyqqan adam emes! Tabiǵaty taza, oiyndaǵysyn adamnyń betine tike aitatyn, er minezdi jan. Ol bireýdi aldaityn adam emes. Bir kiltipaty bar. Almatydan alysta otyrǵan soń eleńdep otyrmyz.
Maqtaraldan shyǵyp, kúlli qazaqtyń júreginen oryn alǵan ánshi-sazger ápkemizge nege mundai jala jaýyp otyr?
Bolǵan kúnniń ózinde bir sheshimi bar shyǵar? El estigen jańalyq eken, el bop birigip, qoldaiyq! Óz basym oqýshy kezimnen Gaýhar ápkeniń ónerin baǵalap, jaqsy kórip ósken janmyn."Saǵyndym, áke" degen ánin, "Aq kelin", "Kelinge ósiet" degen shyǵarmalaryn áli oryndap júrmiz. Eshkimge qiianaty joq, tek shyǵarmashylyqqa ómirin arnaǵan janǵa qalai osylai sheshim shyǵara salǵan?!", — dep jazdy Roza Álqoja jeke paraqshasynda.
"Sotqa da, prokýrorǵa da suraq kóp…Bul iste úlken shikilik baryn sezemin. Oń sheshimin tabatynyna senemin! Gaýhap dosym biz áli talai bir sahnada án salamyz!", — dep qysqa qaiyrdy paraqshasynda Meirambek Besbaev.
Sáken Maiǵazievtiń aiýynsha, ánshiniń áriptesteri kerek somany jinap berýge niettenip otyr.
"QR zańgerlerleri de saýatty túrde egjei-tegjeili zerttep jatqanyna kúmánimiz joq. Qarsy tarap keshirim berip, kelisimge kelse, Gaýhardyń áriptesteri sol somany jinap berýge bar kúshimizdi salamyz dep niettendik. Talantty qyzymyzdy temir torǵa toǵytqanda ne utpaqpyz?! Alla taǵala jábirlenýshi jaqtyń páterge qol jetkizip, qonys toiyn toilaýdy, jaýhardai Gaýharymyzdyń ortamyzǵa oralýyn násip etkei", — dep jazdy Sáken Maiǵaziev.
Ánshi Búrkit óziniń Gaýhar Álimbekovamen jaqyn aralaspasa da, qolynan keler kómegin aiamaitynyn jazdy. Adam óltirgenge 8-9 jyl berip jatqanda aqsha úshin alty jylǵa bostandyǵynan aiyrý sheshimimen kelispeidi ánshi.
"Qudai-aý, million-milliondap urlap, sosyn keshirim surap, aqshalaryn qaitaryp berip jatqandar da bar emes pe?! Nege sonsha qatal bolamyz? Menińshe, keshirimdilikpen qarasaq jón bolar edi. Qansha degenmen, adam ólgen joq. Adam ólgende 8-9 jyl beredi ǵoi, sonda qalai bolǵany? 40-50 myń dollarǵa adamnyń ómiri sáikes kelip tur ma?! Uiat bolady ǵoi basqa elderden! Ózderiniń óner adamdaryn aiamai sottap jatyr myna xalyq dese, uiat emes pe?", — dep jazdy Búrkit.
