Qyzylorda oblysynyń Jańaqorǵan aýdanynda birneshe kún buryn joǵalyp ketken 20 jastaǵy Meiirjan Rústemniń máiiti qudyqtan tabyldy. Qaiǵyly oqiǵaǵa bailanysty «Adam óltirý» baby boiynsha qylmystyq is qozǵalyp, marqumnyń 15 jastaǵy týǵan inisi kúdikke ilingen, dep habarlaidy ult.kz.
Meiirjan 30 mamyrda úiiniń aýlasyna tósek salyp, túnegen. Alaida tańerteń onyń joǵalyp ketkeni belgili bolǵan. Jaqyndary óz betterinshe izdeý júrgizip, bir táýlikten keiin jigittiń denesin úiinen shamamen 400 metr jerdegi jergilikti sý qubyrynyń qudyǵynan tapqan.
Marqumnyń týystary onyń denesinde kógergen izder bolǵanyn, sondai-aq moinynan jipke uqsas iz baiqalǵanyn aitqan. Kei derekte máiittiń kórpege oralǵan kúide tabylǵany kórsetilgen.
Quqyq qorǵaý organdary qylmysqa kúdikti retinde Meiirjannyń 15 jastaǵy týǵan inisin ustaǵan. Ol sot sanktsiiasymen qamaýǵa alynǵan. Alaida marqumnyń ata-anasy bul nusqamen kelispeidi. Olardyń aitýynsha, jasóspirimniń aǵasyna qastandyq jasaǵanyna sený qiyn.
Otbasy buǵan deiin úiden aqsha urlaý faktileri bolǵanyn aityp, qylmysqa basqa adamdardyń qatysy bolýy múmkin degen boljam jasaǵan. Týystary istiń jan-jaqty ári obektivti tergelýin surap otyr.
Qazirgi ýaqytta tergeý jalǵasyp jatyr. Oqiǵanyń naqty mán-jaiy men Meiirjannyń ólimine kimniń qatysy baryn tergeý anyqtaidy.
