Qazaqstannyń Halyq ártisi Roza Rymbaeva kelini Aqerke Búrkitbaidyń otbasyndaǵy qýanyshqa ortaqtasyp, jańa qudalarymen tanysty. Aqerkeniń sińlisi uzatylyp, áýlet dúbirli toi ótkizdi, dep habarlaidy ult.kz.
Qýanyshty jańalyqty Aqerke Búrkitbai áleýmettik jelidegi paraqshasynda bólisti. Ol sińlisiniń uzatý toiyna arnaiy kelgen qonaqtarǵa alǵysyn bildirip, aq tilegin jetkizdi.
"Aqiisimizdi uzattyq. Arnaiy kelip, qýanyshymyzdy bólisken barsha qonaqtarymyzǵa shyn júrekten úlken alǵysymyzdy bildiremiz! Toidyń basynan aiaǵyna deiin birge bolyp, aq tilekterińizdi aityp, atsalysyp, toiymyzdyń kórkin qyzdyrǵandaryńyzǵa myń alǵys. Árbir jyly lebizderińiz ben aq batalaryńyz biz úshin óte qymbat", – dep jazdy Aqerke Búrkitbai.
Saltanatty keshke Roza Rymbaeva da arnaiy qatysqan. Ánshi kelininiń tórkinimen birge qýanyshty sátti bólisip, jas jubailarǵa aq batasyn berdi. Osylaisha, óner iesi kelini jaǵynan jańa qudalarymen tanysyp, eki áýlettiń qýanyshyna kýá boldy.
Aita keteiik, Aqerke Búrkitbai – ánshi Áli Oqapovtyń jary. Juldyzdy áýlettiń kelini áleýmettik jelide otbasy ómirinen túrli sátterdi bólisip otyrady.
Roza Rymbaeva kim?
Roza Qýanyshqyzy Rymbaeva – qazaq estradasynyń eń tanymal ókilderiniń biri, Qazaqstannyń halyq ártisi.
Ol 1957 jyly 28 qazanda qazirgi Abai oblysy aýmaǵyndaǵy Jańǵyztóbe eldi mekeninde dúniege kelgen.
Ánshi kásibi óner jolyn 1970-jyldary bastaǵan. Alǵashynda "Gúlder", keiin "Arai" estradalyq ansamblderinde solist boldy.
Roza Rymbaeva keń kólemde 1977 jyly Bolgariiada ótken halyqaralyq "Altyn Orfei" festivalinde Gran-pri ielengennen keiin tanyla tústi.
Bul jeńis sol kezeńdegi qazaq jáne keńes estradasy úshin úlken jetistik sanaldy.
Onyń oryndaýyndaǵy "Áliia" áni ánshiniń shyǵarmashylyq jolyndaǵy basty týyndylardyń birine ainaldy. Sondai-aq "Atameken", "Otandastar",
"Bir bala", "Sáýlem-ai", "Kýá bol", "Nazqońyr", "Jańbyrly tún" sekildi ánderi halyq arasynda keń tarady.
Roza Rymbaeva 22 jasynda Qazaq KSR-iniń eńbek sińirgen ártisi atandy.
29 jasynda oǵan Qazaq KSR-iniń halyq ártisi ataǵy berildi.
Ol Qazaqstan Respýblikasynyń Memlekettik syilyǵynyń laýreaty.
Ánshi "Qurmet" jáne "Parasat" ordenderimen marapattalǵan. Sondai-aq Roza Rymbaevaǵa "Qazaqstannyń Eńbek Eri" joǵary ataǵy berilgen.
Ol tek ánshi retinde emes, kinoaktrisa jáne ustaz retinde de tanylǵan.
Roza Rymbaeva – professor, birneshe býyn jas oryndaýshylardyń qalyptasýyna úles qosqan óner qairatkeri.
2020 jyly oǵan Almaty qalasynyń Qurmetti azamaty ataǵy berildi. Sondai-aq ol Shyǵys Qazaqstan oblysynyń Qurmetti azamaty atanǵan.
2024 jyly Roza Rymbaevaǵa Qyrǵyz Respýblikasynyń halyq ártisi ataǵy berildi.
Óner iesiniń uldary Áli Oqapov pen Mádi Rymbaevta shyǵarmashylyq salada eńbek etip júr.
Jarty ǵasyrdan astam ýaqyt sahnada júrgen Roza Rymbaeva búginde qazaq estradasynyń simvolyna ainalǵan óner qairatkerleriniń biri.
