Qazaqtyń bulbuly atanǵan Roza Baǵlanova ásem daýysymen ǵana emes, sahnadaǵy sán-saltanatymen de el esinde qaldy. Ánshiniń úkili taqiiasy, oiýly kóilegi men zerli áshekeileri onyń ajyramas beinesine ainaldy. Alaida sol erekshe kiimderdiń úlgisin kim jasaǵanyn, qalai tigilgenin jáne búginde qaida saqtalǵanyn kópshilik bile bermeidi. Ult.kz tilshisi áigili ánshiniń sahnalyq kiimderiniń tarihyna úńildi.

Ánshiniń kóilekterin áigili sýretshi jasaǵan
Roza Baǵlanova sahnaǵa shyqqanda ulttyq kiimniń sánin kórsetýdi erekshe mańyzdy sanaǵan. Onyń kópshilikke tanys sahnalyq kóilekteriniń úlgisin belgili sýretshi Gúlfairýz Ysmaiylova jasaǵan. Bul týraly mýzei zertteýshisi L. Ibraevanyń "Ánshi Roza Baǵlanovanyń sahnalyq kiimderi" atty ǵylymi maqalasynda jazylǵan.
Sýretshi óz esteliginde ánshiniń ulttyq naqyshtaǵy kiimderiniń kópshiligine úlgi daiyndaǵanyn aitqan. Al Roza Baǵlanova shetelge barǵan saiyn onyń eńbegine alǵys bildirip otyrǵan. Ánshiniń kiimderin sol kezdegi Ortalyq Komitettiń tapsyrmasymen arnaiy sheberler tikken. Degenmen matanyń túsin, keide kóilektiń úlgisin Roza Baǵlanovanyń ózi tańdaǵan.

Bir qyzyǵy, ánshi Býdapeshtke barǵan saparynda kigen kóilegin erekshe yqylaspen eske alǵan. Jibekten tigilgen kóilektiń etegi men jeńi úsh qatar jelbirshekpen kómkerilgen. Qozǵalǵan saiyn jelbirshekteri terbelip, sahnadaǵy ánshige ózgeshe kórik bergen. Ol kóilegine kúmisten jasalyp, altyn jalatylǵan kemer beldik taǵyp, basyna asyl tastarmen bezendirilgen úkili taqiia kigen.
1967 jyly tigilgen kóilek mýzeige qalai jetti?
Roza Baǵlanovanyń sahnada kigen erekshe kiimderiniń biri 1967 jyly arnaiy tigilgen. Ánshi bul kiimmen Máskeýde, Frantsiiada jáne Qazaqstannyń kóptegen qalasynda óner kórsetken.

Qara barqyttan tigilgen kóilektiń keýde tusy qyzyl matamen bezendirilip, etegi men jeńine birneshe qatar jelbirshek qosylǵan. Oiýlary túrli tústi monshaqtarmen kómkerilgen. Kiimge úkili taqiia men qyzyl bylǵary etik te kirgen.
Bul jádiger 1975 jylǵy 17 jeltoqsanda resmi akt negizinde Qazaqstan Respýblikasynyń Memlekettik ortalyq mýzeiine ótkizilgen. Ony "Qazaqkontsert" uiymynan mýzeidiń ǵylymi qyzmetkeri A. Aimanbekova alyp, Mádeniet ministrliginiń ruqsatymen qorǵa tapsyrǵan.
Mýzeidiń ǵylymi materialynda kiimniń ár bólshegi, ólshemi men tigilý ereksheligine deiin sipattalǵan.
Rozanyń kóilegi jyldar ótken soń taǵy bir mýzeiden tabyldy
Ánshiniń jeke buiymdarynyń tarihynda taǵy bir qyzyqty oqiǵa bar. 2025 jyly Aikyn.kz basylymy Roza Baǵlanovanyń ózi kigen kóileginiń Pavlodardaǵy mýzeide saqtaýly turǵanyn jazdy.

Belgili bolǵandai, ony 2017 jyly mýzeige ánshi ári sazger Hafiza Ábýǵalievanyń qyzy Gúlmaira Chombolaeva tapsyrǵan. Kóilektiń bul otbasyna qalai kelgeniniń de óz tarihy bar. Roza Baǵlanova Hafiza Ábýǵalievany erekshe jaqsy kórip, sahnada kigen kóilegin oǵan syiǵa tartqan eken. Keiin sol kiim Hafizanyń otbasynda saqtalyp, aqyrynda mýzei qoryna ótken.
Al 2024 jyly Roza Baǵlanovanyń uly Tájen men kelini Maral ánshiniń shapanyn, bórigin, sahnalyq aiaqkiimin, kontserttik afishasy men ómirbaiandyq kitabyn "Anaǵa qurmet" mýzeiine tabystaǵan.
Osylaisha, kezinde álem sahnalarynda jarqyraǵan Roza Baǵlanovanyń kóilekteri búginde qazaq óneriniń qundy jádigerine ainaldy. Ár kiimniń astarynda ánshiniń talǵamy ǵana emes, ony daiyndaǵan sheberlerdiń eńbegi, el aralaǵan saparlary men sahnadaǵy ǵumyry jatyr.