Senator Nurlan Bekenov Úkimet basshysy Álihan Smaiylovtyń atyna joldaǵan depýtattyq saýalynda kapitaldyń Qazaqstannan zańsyz shyǵyp ketýimen kúres is-sharalary týraly aitty, dep habarlaidy QazAqparat.
Depýtat qoldanystaǵy zańnamaǵa ózgerister engizý bir jaǵynan kapitaldy shetelge shyǵarýdy edáýir qysqartýǵa, ekinshi jaǵynan respýblikalyq biýdjetke qarajat túsimin arttyrýǵa kómektesetinin atap ótti.
Senatordyń pikirinshe, baqylanatyn sheteldik kompaniialardyń qyzmetine erekshe nazar aýdarý kerek. Qazaqstannyń salyq zańnamasynda 2018 jyldan bastap olarǵa salyq salý týraly norma bar. Ondaǵy talaptyń máni, eger Qazaqstan Respýblikasynyń rezidentine tiesili sheteldik kompaniia shetelde salyq tólemegen bolsa, onda oǵan elimizde salyq salynatyn bolady.
«EYDU mamandarynyń baǵalaýy boiynsha qazaqstandyq normalar barlyq halyqaralyq talaptarǵa jaýap berdi. Degenmen, osy normalardy qabyldaǵannan keiin quramyna 55 el kiretin konventsiiadaǵy elderge birden eki jyldyq shekteý engizildi. Osylaisha, bul norma kapital shyǵarylǵan iýrisdiktsiialarǵa qoldanylmaityn boldy. Osydan keiin bul normalar odan ári ózgeriske ushyrady, atap aitqanda, negizsiz jeńildiktermen tolyqtyryldy jáne tiimdi salyq stavkasynan nominalǵa kóshti, osylaisha bul normalar jumys istemeitin erejege ainaldy», - dedi Nurlan Bekenov.
Senator Qazaqstanda bolǵan sońǵy oqiǵalardy eskere kelgende, kapitaldy elden shyǵarý tek jedeldegenin atap ótti. Biyldyń qańtarynda ekinshi deńgeidegi bankter 248 ret transshekaralyq tólem júrgizýden bas tartty, bul ótken jyldyń osy kezeńimen salystyrǵanda 2,4 ese kóp jáne 2021 jylǵy jeltoqsanmen salystyrǵanda 1,5 ese artyq.
«Shetelderden salyqtan jaltarý joldaryn izdemeitin adal biznes úshin bul normalar qiyndyq týǵyzbaidy. Bul normalar biýdjetke úlken soma ákelý úshin ǵana emes, sonymen birge olar elden kapitaldy shyǵarýǵa kedergi keltirý úshin jaǵdai jasaýy kerek edi. Qazir bul normalar jumys istemeidi, qaita kapitaldy elden shyǵarýǵa jaǵdai jasaidy. Joǵaryda aitylǵandardy eskere otyryp, baqylanatyn sheteldik kompaniialarǵa salyq salý týraly normanyń qoldanylýyn toqtata turatyn barlyq negizsiz jeńildikterdi dereý alyp tastaýdy, onyń ishinde salyq salýdyń tiimdi mólsherin paidalanýǵa oralýdy suraimyz», - dep atap ótti senator.
