Quramyna Parlament depýtattary men memlekettik organdardyń, «Nur Otan» partiiasynyń, «Atameken» UKP jáne buqaralyq aqparat quraldarynyń músheleri kiretin Memlekettik qyzmet isteri jáne sybailas jemqorlyqqa qarsy is-qimyl agenttiginiń Ádep jónindegi komissiianyń kezekti otyrysy ótti. Onda sybailas jemqorlyq pen qyzmettik ádep normalarynyń talaptaryn buzǵan birqatar vedomstvo qyzmetkerleriniń máseleleri qaraldy.
Memlekettik qyzmetke kir keltiretin tártiptik teris qylyqtardyń aldyn alý jóninde sharalardy ázirleý komissiianyń negizgi fýnktsiialarynyń biri bolyp tabylady. Sondyqtan da ashyq esik jaǵdaiynda ótken ýákiletti organnyń kezekti otyrysynda Bilim jáne ǵylym ministrligi Ǵylym komitetiniń, Ádilet ministrliginiń jáne Ulttyq ekonomika ministrligi Memlekettik materialdyq rezervter komitetiniń tenderlik komissiia múshelerine qatysty 3 tártiptik is qaraldy.
Kún tártibine shyǵarylǵan máselelerdi talqylaý nátijesinde komissiia Ǵylym komiteti tóraǵasynyń orynbasary L.Qusaiynovany laýazymynan bosatý túrindegi tártiptik jaza qoldaný sheshimin qabyldady. Desek te, agenttik tóraǵasynyń orynbasary Alik Shpekbaevtyń tóraǵalyǵymen ótken otyrysta mundai sheshimdi quptamaǵan komissiia músheleri de boldy. Sebebi, óz isiniń bilgiri ári osy salaǵa qatysty keibir zańdardyń jazylý protsesine belsendi qatysqan Lázzat Qusaiynovanyń bar kinási – kezekti eńbek demalysyn paidalanyp Iranda ótken ǵylymi-praktikalyq konferentsiiaǵa qatysyp qaitýy bolypty.
Mine, bul sapar endi ózine bále bop jabysqan syńaily. Óitkeni, qoldanystaǵy zańdarymyz Ǵylym komiteti tóraǵasynyń orynbasaryna ministrliktiń jaýapty hatshysy M.Rahymjanovtyń ruqsatynsyz shetelge saparǵa shyǵýyna tyiym salady eken. Alaida, sáýir aiynda bar shyǵynyn óz moiyndaryna alatyndyǵyn habarlap, Irannan jetken shaqyrtýdy L.Qusaiynova basshylyǵyna kórsetkende, jaýapty hatshy tarapynan bul áreket maquldanbaidy. Al alqaly jiynnan shet qalǵysy kelmegen L.Qusaiynova kezekti eńbek demalysyn alady da, Tegeranǵa tartyp otyrady.
Otyrysta osy máselege orai ún qatqan Bilim jáne ǵylym ministrligi Zań qyzmeti jáne halyqaralyq yntymaqtastyq departamentiniń direktory Nurseiit Baijanov tóraǵa orynbasarynyń bul áreketi zańǵa qaishy ekendigin aitty. «Bul kisiniń memlekettik qupiia qujattarǵa ruqsaty bolmasa da, sondai deńgeidegi adamdarmen bailanysýǵa múmkindigi óte joǵary. Sondyqtan da Qusaiynova basshylyqtyń kelisiminsiz shetelge shyqpaýy tiis edi», – dedi ol.
Komissiia músheleriniń biri kámeletke tolmaǵan eki balasynyń baryn jáne 20 jyldyq eńbek ótilinde bir ret te eskertý ne sógis almaǵanyn eskerip, L.Qusaiynovany birden qyzmetten qýmai, laýazymyn tómendetý joldaryn qarastyrýdy usynǵan edi. Alaida, «Memlekettik qyzmet týraly» Zańnyń 50-baby, 1-tarmaǵy, 18-tarmaqshasyna sáikes, mundai jaǵdaida túsinistik tanytý arqyly túiindi tarqatý zańǵa tompaq keletin bolyp shyqty. Sondyqtan da, Ádep komissiiasy músheleri daýysqa salý arqyly zań aiasyndaǵy tiisti jaza – qyzmetten shettetý týraly sheshim shyǵarmasqa sharasy qalmady.
Odan ózge eki jaǵdaida qyzmetkerlerdiń keibiri ózderinen ketken qatelikterin birden moiyndap, qandai shara men jaza taǵaiyndalsa da qarsy ýáj aita almaityndaryn bildirdi. Ásirese, Ádilet ministrligi Sot aktilerin oryndaý departamentiniń biliktilik komissiia múshelerine qatysty suraqqa alynǵandar arasynda bildei jeti qyzmetkerdiń kemshiligi úshin jalǵyz ózin jazalaýdy ótingen azamattar da boldy.
Al Ulttyq ekonomika ministrliginiń Memlekettik materialdyq rezervter komitetindegi tenderlik komissiia múshelerine qatysty máselede Ádep komissiiasynyń músheleri keibir qyzmetkerlerdi tiesili laýazymdarynan tómendetý týraly sheshim qabyldady. Endigi jerde olarǵa qyzmetine tolyq sáikes emestigi týraly eskertý túrindegi tártiptik jaza qoldanylatyn boldy.
Aita keteiik, sybailas jemqorlyqqa qarsy zań buzýshylyqtardyń aldyn alý men memlekettik qyzmetshilerdiń jemqorlyqqa tózbeýshilik qaǵidattaryn qalyptastyrý jýyrda ǵana qaita qurylymdaýdan ótken Memlekettik qyzmet isteri jáne sybailas jemqorlyqqa qarsy is-qimyl agenttiginiń basty basymdyqtarynyń biri bolyp tabylady. Sondyqtan da osy taqylettes otyrystardy ashyq esik jaǵdaiynda jii uiymdastyrý daǵdyǵa ainalyp keledi.
Nurlybek DOSYBAI,
«Egemen Qazaqstan»
.jpeg)