Jambyl oblysynda «ForYou Energy» JShS qolǵa alǵan qatty turmystyq qaldyqtardy kádege jaratatyn zaýyttyń qurylysyna kapsýla salý rásimi ótti. Iri investitsiialyq joba Qazaqstan Respýblikasy men Koreia Respýblikasy arasyndaǵy investitsiialyq yntymaqtastyq aiasynda júzege asyrylady, dep habarlaidy ult.kz óńir ákimdigine silteme jasap.
Joba aiasynda qatty turmystyq qaldyqtardy óńdep, elektr energiiasyn óndiretin zamanaýi keshen salynady. Jobanyń jalpy quny 80 mlrd teńgeni quraidy. Ol eki kezeńmen iske asyrylady. Birinshi kezeń 2027 jyldyń I toqsanynda, ekinshi kezeń 2029 jyldyń III toqsanynda paidalanýǵa beriledi.
Kásiporynda Koreia Respýblikasynyń ozyq tehnologiialary engizilip, táýligine 900 tonnaǵa deiin qatty turmystyq qaldyq óńdeledi jáne 20 MVt-qa deiin elektr energiiasy óndiriledi. Qurylys kezeńinde 400 adam eńbek etedi. Zaýyt tolyq iske qosylǵannan keiin kásiporynda 200 adam turaqty jumyspen qamtylady.
Jobanyń negizgi maqsaty – qorshaǵan ortaǵa túsetin ekologiialyq júktemeni azaitý jáne «jasyl» energetikany damytý. Sonymen qatar qazaqstandyq mamandardyń biliktiligin arttyrýǵa basymdyq beriledi. «Taza Qazaqstan» baǵdarlamasy aiasynda biyl kúzde qurylys alańyna 1000 túp qaraǵash otyrǵyzý josparlanyp otyr.
