Taraz qalalyq №2 soty Jambyl oblysy politsiia departamenti bastyǵynyń burynǵy orynbasary Jaidarbek Quttybaevty para alý isi boiynsha 6 jylǵa bas bostandyǵynan aiyrdy. Al Talas aýdandyq politsiia bóliminiń burynǵy basshysy mindetin atqarǵan Erken Abaev 5 jylǵa sottaldy, dep habarlaidy ult.kz.
Sot sheshimimen ekeýi de ómir boiyna memlekettik qyzmette jáne quqyq qorǵaý organdarynda jumys isteý quqyǵynan, sondai-aq arnaiy ataqtarynan aiyryldy.
Aiyptalýshylar óz kinálaryn moiyndamai, qylmystyq istiń qoldan uiymdastyrylǵanyn aityp, aqtaýdy surady. Qorǵaýshylar aiyptaý negizinen jábirlenýshiniń sózderine súiengenin jáne is materialdarynda jetkilikti dálelderdiń joq ekenin málimdedi.
Sońǵy sózinde Jaidarbek Quttybaev quqyq qorǵaý salasynda 29 jyl qyzmet etkenin aityp, tergeý usynǵan dálelder onyń kinásin rastamaitynyn jetkizdi. Onyń aitýynsha, jábirlenýshi tergeý barysynda birneshe ret jaýabyn ózgertken.
Erken Abaev pen onyń qorǵaýshylary da aiyptaýdyń daýly aiǵaqtarǵa negizdelgenin alǵa tartty. Alaida sot kýálardyń jaýaptary men ózge de dálelderdi zerttei kele, aiyptalýshylardyń kinási tolyq dáleldengen degen qorytyndyǵa keldi.
Úkim ázirge zańdy kúshine engen joq. Sottalǵandardyń jaqyndary joǵary turǵan sotqa shaǵym túsiretinderin málimdedi.
