Qazaqstan aýmaǵynda jumys isteitin TikTok, YouTube jáne ózge de tsifrlyq platformalar ulttyq zańnama talaptaryn, onyń ishinde jasandy intellekt kómegimen jasalǵan kontentke qatysty normalardy saqtaýǵa mindetti. Bul týraly QR Jasandy intellekt jáne tsifrlyq damý vitse-ministri Baqtiiar Muhametqaliev málimdedi, dep habarlaidy ult.kz.
Onyń aitýynsha, zań talaptary tek kontent avtorlaryna ǵana emes, Qazaqstanda qyzmet kórsetetin barlyq tsifrlyq platformalarǵa da qoldanylady.
– TikTok Qazaqstanda resmi túrde jumys isteidi. Keibir platformalardyń elimizde keńsesi bolmaýy múmkin. Soǵan qaramastan, olar zańdy tulǵa retinde Qazaqstan zańnamasynyń talaptaryn oryndaýǵa mindetti, – dedi vitse-ministr.
Baqtiiar Muhametqaliev jasandy intellekt arqyly jasalǵan kontentti tańbalaý tek sailaý naýqany kezinde ǵana emes, kúndelikti aqparattyq keńistikte de mańyzdy ekenin atap ótti. Onyń sózinshe, sońǵy ýaqytta JI kómegimen daiyndalǵan jalǵan aqparat pen internet-alaiaqtyq áreketteriniń sany artyp keledi.
Aita keteiik, búgin Qazaqstannyń strategiialyq zertteýler institýty (QSZI) alańynda sailaýaldy kezeńdegi jasandy intellektiniń róli, tsifrlyq tehnologiialardyń yqpaly jáne feik aqparatpen kúres máseleleri talqylanyp jatyr.
