QR Parlamenti Májilisiniń depýtaty Zaǵipa Balieva BAQ ókilderinen balanyń nazaryndaǵy jańalyqtardy tsenzýradan ótkizip otyrýdy surady, dep habarlaidy QazAqparat.
«Biz búginde balalardy tolyqtai qorǵaý jóninde aityp otyrmyz. Munda áleýmettik jeliler men telebaǵdarlamalar da bar. Zańnamalyq turǵyda da ishki qarama-qaishylyqtar bar, biz olardy sheshýimiz kerek. Qazaqstan aýmaǵyna jańalyqtardan basqa aqparattyq ónimderdiń tańbalanýsyz ótpeýi qajettigin aityp otyrmyz, biraq jańalyqtarda da kórsetilmeýi tiis nárseler bar. Bizge BAQ-pen birge osy taqyrypta ashyq sóilesý kerek», - dedi ol balalardy ziiandy jáne olardyń damýyna nuqsan keltiretin aqparattardan qorǵaý máselelerine arnalǵan zań jobasyn tanystyrý barysynda.
«Olar kólikten jolǵa laqtyrylǵan jańa týǵan shaqalaqty kórsetken kezde, bul balalarymyzǵa jaǵymdy áser qaldyrmaityny anyq, olardyń boiynda qorqynysh uialaidy. UBT kezinde túlekter arasyndaǵy sýitsidtiń statistikasyn kórsetken kezde, ol týraly oilamaǵan balanyń ózi sol týraly oilana bastaidy. Sondyqtan bunyń eki qyry bar. Zań shyǵarýshylar ǵana emes, biz barlyǵymyz, BAQ, ata-analar, internet-qaýymdastyq, ministrlikter, basqa da memlekettik organdar normalar men áleýmettik jaýapkershilik jóninde oilanýymyz kerek», - dep atap ótti Z. Balieva.
Depýtattyń sózinshe, keide keibir telearnalar reiting úshin balanyń ishki jan-dúniesine keri áserin beretin jaittardy ashyqtan-ashyq kórsete beredi.
«Ata-analardyń jaýapkershiligi týraly sheksiz aita berýge bolady, biraq olar jaýapsyz bolsa, osy kezde BAQ kómekke kelip, tanymdyq demo-filmderdi kórsetýi tiis. Ókinishke orai, ata-analardyń barlyǵy balany qalai tárbieleý kerektigin bilmeidi, biraq solai eken dep balany qaýiptiń ortasynda qaldyrýǵa bolmaidy. Biz balalardy Internetpen ońasha qaldyryp otyrmyz. Balalarymyz telearna qaramaityn boldy. Balanyń barlyǵy telearna qaraidy dep oilamańyzdar. Bizdiń jetkinshekter «Internet» atty ózge álemde ómir súrip jatyr. Olardyń barlyǵy Facebook-te, áleýmettik jelilerde otyrady. Bizde áleýmettik jeli arqyly kez kelgen aqparatty jariialai salatyn paidalanýshylarǵa qatysty jaýapkershilik joq. Áleýmettik jeli - jaqsy dúnie ekeni daýsyz, alaida onyń árbir qoldanýshysy jelige aqparat jariialamas buryn, jaýapkershilikti sezinýi tiis», - dedi Z. Balieva.
